गोल्डलोन दिवपाचें हांयस दाखोवन फटवणूक, मुखेल ठकसेना सयत पांच जाणांचे टोळयेक अटक

भांगरभूंय | प्रतिनिधी

म्हापशें, प्रतिनिधी ः गोल्डलोन दितां अशें सांगून पालयें- उसकयंतले एके बायलेक एक लाख रुपयांक फटयिल्ल्या प्रकरणांत मनीष आंबेकार (47, पनवेल, महाराष्ट्र) ह्या ठकसेना सयत पांच जाणांचे टोळयेक म्हापशें पुलिसांनी अटक केली.
मेळिल्ले म्हायती प्रमाण, पालयें- उसकयंतले रेश्मा ओगळे हांणी हे संबंदी पुलिशेंत कागाळ नोंद केली. नोंदी प्रमाण, 21 जानेवारीक सांजवेळा 4:35 वरांचेर रेश्मा म्हापशेंतल्या मुथूट फायनान्सांत गेली तेन्ना गोल्ड लोन कंपनीचो कर्मचारी आशिल्ल्याचें सांगून एक मनीस तिचे कडेन गेलो आनी भांगराचें रीण दिवपाचें हांयस दाखोवन तिचे कडल्यान 1 लाख रुपया घेतले. कांय काळा उपरांत आपली फटवणूक जाली हें रेश्माक कळ्ळें तेन्ना तिणें त्या मनशाक आडावपाचो यत्न केलो. पूण तो मनीस पयशे घेवन पळून गेलो.
रेशमाची कागाळ आनी गुन्यांवाच्या स्वरूपाचो विचार करून ह्या प्रकरणांत म्हापशें पुलीस स्टेशनाचे निरिक्षक निखिल पालेकार हांच्या फुडारपणा खाला म्हापशें पुलिसांनी खाशेलो तपास पंगड तयार केलो. ह्या पंगडान हेर पुलीस कर्मचाऱ्यांच्या मजतीन मुथूट फायनान्साच्या वाठारांत आशिल्ल्या सीसीटीव्ही कॅमेऱ्यांची बारीकसाणेन तपासणी केली. त्या मनशाची वळख जाले उपरांत पुलिसांच्या नोंदींतय त्या मनशा विशीं म्हायती आशिल्ल्याचे कळ्ळें. हे आनी हेर जायत्या गजालींचेर आदारून पुलिसांनी हे टोळयेचो ठकसेना मुखेली मनीष आंबेकार (47, पनवेल- महाराष्ट्र) हाचे सयत शिव आंबेकार (24), रवी चव्हाण (42), करण चव्हाण (20) आनी यश चव्हाण (20) हांकां अटक केली. तांचे कडल्यान पुलिसांनी 59 हजार आनी महिंद्रा बोलेरो जीप जप्त केल्या.

मजगतीं, मेळिल्ले म्हायती प्रमाण महाराष्ट्रांतूय मनीष आंबेकार हाचे आड अशेंच तरेचे 9 गुन्यांव नोंद आसात. उत्तर गोंय पुलीस अधीक्षक अक्षत कौशल आनी म्हापशेंचे उपअधीक्षक संदेश चोडणकार हांच्या फुडारपणा खाला पुलीस निरिक्षक निखिल पालेकार आनी हेर पुलीस कर्मचाऱ्यांनी ही कारवाय करून हें टोळयेक उक्तडार हाडली. फुडलो तपास सुरू आसा.