भांगरभूंय | प्रतिनिधी
मडगांव, प्रतिनिधी ः मडगांव शारांतल्या जायत्या सुवातींनी बेकायदेशीर रितीन लायिल्ले बॅनर, वण्टींचेर लायिल्ली चित्रां, पोस्टर आदी हांका लागून शारांची सोबीतकाय उणी जावपाक लागल्या. मडगांव पालिका प्रशासनान 45 दिसां भितर खाशेली मोहीम चालीक लावन हे प्रस्न सुटावे करचे. हाचे भायर फुडाराक अशें जावचें न्हय हे खातीर वेळोवेळ कारवाय करपाचो आदेश दक्षीण गोंय जिल्होधिकारी एग्ना क्लिंटीस हांणी दिला.
दक्षीण गोंय जिल्होधिकारी एग्ना क्लिंटिस हांणी मडगांव पालिका म्हामंडळाच्या मुखेल अधिकाऱ्यांच्या नांवान आदेश जारी करून शारांची सोबीतकाय इबाडपी सगल्या बेकायदेशीर जायराती आनी बॅनरांचेर कारवाय करची अशें सांगलां. हो आदेश जिल्लोधिकाऱ्यान गोंय मालमत्तेचो गैरवापर प्रतिबंध कायदो, 1988 च्या कलम 7 खाला जारी केला. मडगांव शारांत चुकीच्या सुवातेर बेकायदेशीर बॅनर आनी जायराती लायिल्ल्या नागरिकांक तशेंच पर्यटकांकय असुविधा निर्माण जावपाक लागल्या. मडगांव शारांची सोबीतकाय आनी पर्यावरणीय अखंडताय तिगोवन दवरपा खातीर पालिकेन ही कारवाय करपाची गरज आसा. उद्यानां लागसार, रस्त्याच्या तकट्यांचेर, ओलतांचेर, पुलांचेर आनी वण्टींचेर बॅनर, चित्रां, पोस्टर्स, होर्डिंग बेकायदेशीरपणान लायिल्ली दिश्टी पडटात. ते खातीर फावो ते कर्मचारी, अंमलबजावणी पंगड नेमून गरजेचीं साहित्यां आनी साधनां दिवन एक खाशेली मोहीम आयोजीत करची.
शारांतल्यो बेकायदेशीर जायराती आनी बॅनर दोन म्हयन्यांच्या काळांत काडून उडोवचे. ताचो फोटों सयत अहवाल तयार करून जिल्होधिकारी कार्यालयांत सादर करचो. ही कारवाय थारावीक अंतरान नेमान करची. तशेंच हे संबंदी जन जागृताय निर्माण करची आनी अशी घडणूक घडची न्हय हे खातीर मडगांव पालिकेन लक्ष दिवचें अश्यो सुचोलण्यो केल्यात. हाचे भायर दक्षीण गोंय जिल्होधिकाऱ्यांनी ह्या आदेशाक पाळो दिलो ना जाल्यार उल्लेख केल्ल्या अधिकारी वा कर्मचार्यांचेर कायदेशीर कारवाय करपाची शिटकावणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
