भांगरभूंय | प्रतिनिधी
सेलडीड रद्द, जमीनूय परत मेळयिल्ल्याचें स्पश्टीकरण
पणजी : बनावट कागदपत्रांच्या आधाराचेर जमनीचो वेव्हार करून फटयिल्ले खातीर कवळे मठाधीश शिवानंद सरस्वती स्वामी, अवधूत शिवराम काकोडकार आनी अॅड. मनोहर आडपयकार हांचे आड फोंडें पुलीस स्टेशनांत गुन्यांव नोंद केला. हे विशीं न्यूरोसर्जन डॉ. पी. एस रामाणी आनी मठाचे अनुयायी भूषण जॅक हांणी कागाळ नोंद केल्ली.
मजगतीं, हे घडणुकेक लागून ह्या मठा कडेन जोडिल्ल्या गोंय, महाराष्ट्र आनी कर्नाटकांतल्या भाविकां मदीं बरोच बोवाळ जाला. ही कागाळ १५ जानेवारीक केल्ली. कवळे मठाधीशांनी जमनीचो वेव्हार करपा खातीर सेलडिडाचेर आदले स्वामी सच्चिदानंद सरस्वती हांची सय वापरली असो आरोप कागाळेंत केला.
जमनीचो वेव्हार करपाच्या वेळार मुंबयच्या धर्मादाय आयुक्तांक काळखांत दवरले. मठाच्या विश्वस्त मंडळाक स्वामींनी बरखास्त करीत, सगळे अधिकार आपले कडेन दवरिल्याचेय आरोप केल्यात. तशेंच हेर जायत्या सुवातांचेर बेकायदेशीर जमीन वेव्हार केल्ल्याचो थपको तांचेर दवरला. मजगतीं हे विशीं फोंडें पुलिसांनी भादंवि ४२०, ४१९ ४६५ कलमान्वये गुन्यांव नोंद केला.
सेलडीड रद्द, जमीनूय मेळ्ळी
मजगतीं, कवळें मठ समितीचे एक वांगडी प्रफुल्ल हेदे हांणी सांगलें, सध्याच्या स्वामीन संवसाराक अंतरिल्ल्या स्वामीच्या नांवान सय करपाचो प्रकार हो नदरचुकीन जाला. तो लक्षांत येतकच तांणी स्वताच तें विक्रीखत (सेलडीड) रद्द केलां. ती जमनीय परत मेळयल्या. म्हणटकच जाणूनबुजून हो गैरवेव्हार केला, अशें म्हणपाक मेळचेंना. तांकां सल्लागारांनी चुकीचो सल्ला दिल्ल्यान हें घडलां, अशेंय तांणी सांगलें.
कारकुनी चूक
कारकुनी चुकीक लागून हो प्रकार घडलो, अशें अॅड. मनोहर आडपयकार हांणी म्हणलां. ह्या विक्रीखता खातीर स्वाम्यान आपलो अॅटर्नी अवधूत काकोडकार हांकां नेमिल्ले. तांचे वतीन तो वेव्हार जालो. मात सेल डिडाच्या टायटलाचेर चुकून आदले स्वामी सच्चिदानंद सरस्वती हांचें नांव आयलें. ही चूक लक्षांत येतकच सध्याचे स्वामी शिवानंद हांणी दिवाणी न्यायालयांत हें प्रकरण व्हेलें. सेलडीड रद्द करून पयशेय परत केले. हें प्रकरण 2018 तलें. तें कोणे परत कित्याक उस्तुन काडलां, तें कळना. मठाचे समिती खातीर वेंचणूक जावपाची आसा, ताका लागून घडये हें केलां आसूं येता, अशें दिसता, अशी प्रतिक्रिया अॅड. आडपयकार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
