भांगरभूंय | प्रतिनिधी
नवी दिल्ली, खबरां संस्था ः केंद्रीय लोकसेवा आयोगान (UPSC) नागरी सेवा परिक्षा (CSE) 2025 खातीर अधिसुचोवणी जारी केल्या. हाचे भायर यूपीएससी आयएफओएस (UPSC IFoS) म्हळ्यार भारतीय रान सेवा भरतीची अधिसुचोवणी जारी केल्या. आयोगान रान सेवे खातीर 150 पदां खातीर जायरात दिल्या. अंदूं नागरी सेवा परिक्षे खातीर आयोगान 979 पदांची जायरात काडल्या. फाटल्या वर्सा आयोगान 1,105 पदां खातीर जायरात जारी केल्ली.
2023 वर्सा यूपीएससीन 1,105 पदां जाहीर केल्ली, जाल्यार 2022 वर्सा हो आंकडो 1,011 आनी 2021 वर्सा 712 आशिल्लो.
कॅलेंडरा प्रमाण, युपीएससी नागरी सेवा प्राथमीक परिक्षा 25 मे 2025 दिसा जातली. हे परिक्षेंत दोन वस्तुनिष्ठ प्रकारचे (ऑब्जेक्टिव) पेपर आसतले. स्टडीज I आनी जनरल स्टडीज II. दोनूय पेपर 200-200 गूणांचें आसतले. म्हळ्यार ही परिक्षा वट्ट 400 गूणांची आसतली. ही प्राथमीक परिक्षा फकत स्क्रीनिंग चांचणी आशिल्ल्यान ताचे गूण मुखेल परिक्षेंत जोडचे नात. पूण प्राथमीक परिक्षेंत पास जावपी उमेदवारांकूच मुखेल परिक्षेक बसपाक मेळटलें असो नेम आसा.
अर्ज कसो करचो?
० सगळ्यांत युपीएससीची अधिकृत वेबसायट upsc.gov.in भेट दियात.
० मागीर मुखेल पानाचेर उपलब्ध आशिल्ल्या यूपीएससी नागरी सेवा प्राथमीक परिक्षा 2025 नोंदणी लिंकाचेर क्लिक करात.
० ते उपरांत नवी पेज उगडटली, थंय उमेदवारांक ऑनलायन नोंदणी करची पडटली.
० नोंदणी पुराय जातकच तुमच्या खात्यांत लॉग इन करात.
० उपरांत अर्ज भरून अर्ज शुल्क भरचें.
० मागीर सबमिट हाचेर क्लिक करात आनी पेज डाउनलोड करात.
० ताची एक हार्ड कॉपी तुमचे कडेन दवरात.
अर्ज शुल्क कितलें?
बेंचमार्क दिव्यांग आशिल्ल्या बायलांक/ एससी/ एसटी/उमेदवारांक अर्ज शुल्कांत सुट दिल्या. हाचे भायर हेर सगळ्या वर्गांतल्या उमेदवारांक भारतीय स्टेट बँकेच्या खंयच्याय फांट्यांत वा खंयचेय बँकेची नेट बँकिंग सुविधा वापरून वा व्हिसा/मास्टर/रुपे/क्रेडिट/डेबिट कार्ड वा यूपीआय वरवीं 100 रुपया अर्ज शुल्क भरचें पडटलें.
आयोगान हेल्पलायन क्रमांक जारी केला
आयोगान उमेदवारां खातीर हेल्पलायन क्रमांक जारी केला. मार्गदर्शक तत्वां संबंदी कसलोय गोंदळ वा समस्या निर्माण जाल्यार उमेदवारांनी युपीएससी कॅम्पसाच्या सुविधा काउंटर ‘सी’ कडेन भेट दिवन मजत मेळूं येता. हाचे भायर 011-23385271/011-23381125 ह्या दूरध्वनी क्रमांकांचेरूय फोन करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
