भांगरभूंय | प्रतिनिधी
गोंय श्रमीक पत्रकार संघटणेन आयोजीत केली सायबर सुरक्षा कार्यशाळा
पणजी: गोंय साबयर सुरक्षीत जावपा खातीर पुलीस प्रशासन, प्रसार माध्यमां तशेंच हेर भागधारकांनी चडांत चड जागृताय करप गरजेची आशिल्ल्याचें मत पुलीस म्हासंचालक अलोक कुमार हांणी उक्तायलें. बुधवारा गोंय श्रमीक पत्रकार संघटणे वतीन आयोजीत सायबर सुरक्षा कार्यशाळेंत ते उलयताले.
ह्या वेळार पुलीस उपम्हानिरिक्षक अजय शर्मा, वर्षा शर्मा, पुलीस अधिक्षक राहूल गुप्ता, पुलीस निरिक्षक दीपक पेडणेंकार हाजीर आशिल्ले.
अलोक कुमार हांणी सांगलें, फाटल्या कांय वर्सांत गोंयांत सायबर गुन्यांव वाडत आसात. सायबर गुन्यांवां वरवीं पुराय देशांत वर्साक 25 हजार कोटी रुपयांची फटवणूक जाता. गोंयांत अशा गुन्यांवां वरवीं दिसाक सादारणपणान लाखांनी रुपयांची फटवणूक जायत आसा.
पुलीस प्रशासन अशे गुन्यांव आटापा हाडपा खातीर यत्न करीत आसा. हे खातीर आमी फाटल्या स म्हयन्यांत खात्या खाला विशेश यत्न सुरू केल्यात. प्रसार माध्यमां आनी हेर भागधारकांनी लेगीत अशे यत्न करचे.
तांणी म्हणलें, सायबर गुन्यांव कशे जातात, फटवणूक कशी करतात, हें कशें टाळचें, कागाळ खंय करची हे विशींची म्हायती गोंयांतल्या निमाण्या नागरिकां मेरेन पावोवप ही आमची मोख आसा. गोंय पुलिसां कडल्यान हे विशीं समाज माध्यमां वा हेर माध्यमांतल्यान जागृताय मोहीम करतात. गोंयांतल्या प्रसारमाध्यमांनी हे खातीर गोंय पुलिसा कडेन वचून एकठांय काम करूंक जाय. अशें जायत जाल्यार हे वर्स सोंपता म्हणसर सायबर सुरक्षीत गोंय ही मोख साध्य करूंक मेळटली.
पुलीस निरिक्षक दीपक पेडणेंकार हांणी सांगलें, सायबर गुन्यांवकार लोकांचो निश्काळजीपणा, हावरटपणा वा भिरांतीचो आदार घेवन गुन्यांव करतात. गुंतवणुकीचें बनावट अॅप, डिजिटल अरेस्ट, सेक्सटॉरशन, समाज माध्यमांचेर बनावट प्रोफायल, नोकरी दिवपाचे फटीचें हांयस, बनावट रीण अॅप अशा खूबशा पद्दतीन लोकांची फटवणूक सुरू आसा. हे खातीर लोकांनी जागृत रावप गरजेचें आसा. तशेंच आपली वैयक्तीक म्हायती कोणाक दिवची न्हय. आयिल्लो मॅसेज अधिकृतपणान तपासप गरजेचो आसा.
बनावट 85 संकेतथळां बंद
अधिक्षक राहूल गुप्ता हांणी सांगलें, सायबर गुन्यांव कांय वेळार बनावट संकेतथळां तयार करून लोकांची अर्थीक फटवणूक करतात. ही संकेतथळां अधिकृत संकेतथळाची हुबेहूब नक्कल आसता. पूण ह्या संकेतथळाच्या युआरएलांत स्पेलींग चुकीचें आसता. गोंय पुलिसांनी फाटल्या कांय म्हयन्यांत अशीं 85 बनावट संकेतथळां बंद केल्यांत.
म्हत्वाचे मुद्दे
– गुंतवणूक अॅप वा गुंतवणुकदाराची अधिकृततताय सेबीच्या संकेतथळार तपासची.
– डिजिटल अरेस्टांत फटोवपी व्यक्तीक नांव, पद, बॅच नंबर अशी म्हायती विचारची.
– आरबीआयच्या संकेतथळार रीण दिवपी अॅपाची अधिकृतताय तपासची.
– .gov.in वा .nic.in , https:// आशिल्लीं संकेतथळां वापरचीं.
– सायबर फटवणूक जाल्यार 1930 वा 7875756222 ह्या नंबराचेर संपर्क सादचो.
– समाज माध्यमांचेर स्वताचे, तुमचें थळ समजतलें अशे फोटे घालचे न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
