भांगरभूंय | प्रतिनिधी
पणजी : राज्यांत बर्याच दिसां सावन सुरू आशिल्ल्या मंत्रिमंडळ फेरबदलाची चर्चा आनी नवे प्रदेशाध्यक्ष निवडपाचे फाटभूंयेर मुख्यमंत्री डॉ. प्रमोद सावंत हे बुधवारा दिल्लीक पावले. केंद्रीय पर्यावरण, रान आनी हवामान बदल खात्याचे मंत्री भूपेंद्र यादव हांची भेट घेवन तांणी विवीध विशयांचेर चर्चा केली. मुख्यमंत्री दिल्लींत हेर कांय मंत्र्यांचीय भेट घेतले.
केंद्रीय पर्यावरण मंत्री भूपेंद्र यादव हांचे कडेन सीझेडएमपी २०१९ आनी ईएसए अधिसूचवणे विशीं चर्चा केल्ल्याची म्हायती मुख्यमंत्री डॉ. प्रमोद सावंत हांणी व्टिट करून दिली. दयारदेग वेवस्थापन आराखडो २०१९ बेगीनूच निश्चीत करचो अशी मागणी भेटी वेळार केली. पश्चीम घाट जैव संवेदनशील वाठार अधिसुचवणेंतल्यान २१ गांव सोडपाची मागणी गोंय सरकारान केल्या. ह्या विशयाचेर दिल्लींत मुख्यमंत्र्यांनी केंद्रीय मंत्र्यां कडेन चर्चा केली. केंद्रीय पर्यावरण आनी रान मंत्रालयाचे तज्ज्ञ समितीन नोव्हेंबरांत राज्याक भेट दिवन गांवांची पळोवणी केल्ली. तशेंच तज्ज्ञ समितीन मुख्यमंत्री आनी हेर अधिकार्यां कडेनूच चर्चा केल्ली. उपरांत आयज मुख्यमंत्र्यांनी प्रत्यक्ष केंद्रीय पर्यावरण मंत्र्यां कडेन ह्या विशयाचेर चर्चा केली. जे २१ गांव सोडपाची मागणी जाता, तातूंत सत्तरीचे १२, धारबांदोडें म्हालांतले ५, सांगेंचे ३ आनी काणकोणच्या १ गांवाचो आसपाव आसा. फाटल्या ऑगस्टांत जारी केल्ल्या इएसए अधिसुचवणेच्या मसुद्यांत १०८ गावांचो आसपाव केल्लो. हातुंतल्यान २१ गांव सोडचे अशी गोंयची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
