भांगरभूंय | प्रतिनिधी
नवी दिल्ली, खबरां संस्था ः शारिरीक वेदना, दुखणे उणे करपा खातीर खुबशे जाण पेनकिलर सारकिल्लीं वेगवेगळी वखदां घेतात. पूण हाका लागून काळजाचो आताक येवंक शकता वा काळजा संबंदीत दुयेंस जावंक शकतात. पेनकिलर वखदांचो चड वापर केल्यार काळजाचें कार्य इबाडूंक शकता, रगताचे प्लेटलेट्सांत आडखळ निर्माण जावंक शकता, रगताचे गोठे तयार जावंक शकतात, रगतपेशी ल्हान जावंक शकतात जें रगत प्रवाहाक आडखळ हाडून रगतदाब वाडोवंक शकता. हें सगळे काळजाक संबंदीत आशिल्ले धोके पेनकिलर वखदांचो चड प्रमाणांत वापर केल्यार निर्माण जावंक शकतात.
भलायकीच्या वेगवेगळ्या समस्यांचेर उपाय म्हूण वखदां गरजेचीं आसतात. पूण केन्ना केन्ना चड वखदांचो वापर केल्यार ताचे दुश्परिणाम काळजाचेर जावंक शकतात. हाका लागून कार्डिओमायोपॅथी जावंक शकता. कार्डिओमायोपॅथी हो एक काळजाचो दुयेंस. जाचो परिणाम काळजाच्या स्नायूंचेर जाता, जाका लागून काळजाक कुडींच्या हेर अवयवांक रगत पुरवण करप चड कठीण जाता.
वखदांचो काळजाचेर कसो परिणाम जाता?
वखदांचो काळजाच्या ठोक्यांचेर परिणाम जाता. चड वखदांचो वापर केल्यार काळजाचो ठोके अनियमीत जावंक शकता. कांय वखदांक लागून काळजाच्या पेशींचेंय लुकसाण जावं येता. जाल्यार कांय वखदांचो थेट काळजाचेर परिणाम जाता. जशें द्रव सांठोवप, इलेक्ट्रोलायट असंतुलन वा रगतदाब वाडप.
लक्षणां..
लेगीत थकवा जाणवप, स्वास घेवपाक त्रास जावप, पांयाच्या घोंट्यांक सुज येवप, काळजात दुखप अशीं लक्षणां वेळार वळखात. रगत तपासपा खातीर ईसीजी, इको-कार्डियोग्राम, आनी कार्डियक बायोमार्कर सयत नेमान भलायकी तपासणी करची. ताका लागून भलायकेच्यो समस्या बेगीन वळखुपाक मेळटात आनी वेळार उपचार सुरु करुं येता.
चड धोको कोणाक?
वखदांक लागून कोणाकूय हो धोको निर्माण जावंक शकता. पूण कांय पिरायेच्या गटांतल्या लोकांक हाचो चड धोको आसता. हातूंत जाण्टे दुयेंती, काळजाचे दुयेंस आशिल्ले आदींचो आस्पाव आसा. अशीं जायतीं वखदां आसात जाका लागून काळजाचेर ताण येवपाची शक्यताय वाडटा. कॅन्सरावेले उपचार हें वखदां वरवीं जावपी काळजाच्या समस्यांचें सगळ्यांत चड सामान्य कारण आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
