पुरस्कार आनी हांव

भांगरभूंय | प्रतिनिधी

पूण जांणी व्हड यत्न करून पुरस्कार घेतल्यात तांचे कार्यावळींत विरजण कित्याक घालूं? घेवं तांकां पुरस्कार आनी मनोवं तांकां खोशी ह्याच विचारान फाटीं सरलां. पूण हांव पुरस्कार घेवचो ना.

शुक्रारा सांजवेळार एक फोन आयलो. आतां कोणाचोय फोन बी आयलो म्हणजे वोगीच कलकल जाता. ऑफीस सुटलें तेन्नाच्यान फोन येवप बंद जाल्ले. फोनाची सवंय सुटली म्हणल्यार जाता. आतां केन्नाय फोन येताले ते म्हज्या इश्टांचे खबर घेवपाक. पूण हालींसराक फोनांचें प्रस्थ इल्लें चडूच वाडलां. नाका आशिल्ले फोन. केन्ना कस्टमांतल्यान कोण उलयता तर केन्ना सिबिआय. केन्ना रिझर्व बँक तर केन्ना दिल्ली पुलीस. सगळ्यांचे फोन आयकून म्हाका सद्याक हांव कोणतरी व्हड फुडारी, उद्देगपती बी दिसूंक लागलां. सगळ्यांकूच म्हजें कितें तरी सांपडलां आनी तें भायले भायर मिटोवंक हे फोन येतात. तांचे एकूच सांगप, ‘पांच मिणटां भितर कितें तें सांग नासल्यार दारांत पुलीस पावतले.’ दर पांच मिणटांनी हांव दारांत वचून कोण आयला काय पळेतां.
आतांय भियेभियेतूच फोन घेतलो तर कोंकणी अकादेमीच्या प्रभारी अध्यक्षांचो आवाज कानार पडलो. तो म्हाका परबीं भेटयतालो. कसलीं काय परबीं म्हूण विचारतकूच कळ्ळें म्हज्या ‘सपनांतलो गांव’ पुस्तकाक पुरस्कार फावो जाला. आतां हें सपन काय सत तेंच कळणा जालें. कारण कोंकणी अकादेमीचे पुरस्कार मागचे पडटात. थंय फॉर्म बी भरून दिवपाक जाय. म्हजे नदरेन मागून मेळटात ते पुरस्कार न्हय. आनी हांव असल्या पुरस्कारां फाटल्यान केन्नाच वचना. म्हाका तातूंत रुचीच ना. अकादेमीन पुरस्कार दिवपाचें जाहीर केलें तेन्ना म्हज्या एक दोन बरे मागप्यांनी म्हाका फॉर्म भरचो आगरो केल्लो. पूण तांकांय हांवें नमळायेन ना म्हणिल्लें. म्हणटकूच हे सर्तींत हांव नासलोंच. मागीर म्हाका पुरस्कार कसो मेळ्ळो? हांवें अध्यक्षांक तशें म्हणलें तर ताणें आयकूंक नाशिल्लेवरी केलें आनी तुजो फोटू आनी बायोडाटा धाड म्हूण सांगून फोन बंद केलो.
म्हाका हें खटकलें पूण दुसरे दिसा कळ्ळें ताका चार डझन लोकांक परबीं भेटोवचीं आसलीं म्हणजेच ताचे कडेन चड उलोवंक वेळ नासलो. दुसरे दिसा ही खबर वर्तमानपत्रांनीय छापून आयली. आतां म्हजे नांवान कोणे फॉर्म भरलो, कोणे म्हजें पुस्तक सुचयलें म्हाका कांयच खबर ना. हांव पुरस्कार घेतलों काय ना हेंवूय म्हाका कोणे विचारूंक ना. आमी दिलो म्हणजे हो घेतलोच अशें गृहीत धरून हें सगळें केलां आसूंक जाय. लेखकांक स्वभिमान बी म्हणून आसता काय ना? आसूंक जाय न्ही तो? जांणी पुरस्कार मागल्या तांचे विशीं उलयना हांव. पूण जांणी मागूंक नासतना दिल्यात तांकां तरी पयलीं विचारूंक जाय आसलें काय दिसता. सगळ्यांक एकाच मापांत कशे मेजतले?
अकादेमीक एकाच वांगडा डझनांनी लोकांक वांगडाच कित्याक उजरायन दिसले काय? तीन तीन वर्सांचे पुरस्कार एकाच वर्साक दिवपा फाटलो उद्देश कळणा. बरें जांकां पुरस्कार दिल्यात तातूंतल्या सगळ्यांनीच ते मागिल्ले काय म्हजेवरीच आनिकूय कोणाक मागनासतना दिल्यात? आनी दिल्यात जाल्यार तांकांय विचारनासतनाच दिल्यात? लेखकाक इल्लो तरी मान मेळूंक जाय न्ही? तांकां पयलीं सांगूक जाय न्ही, तुमचें नांव पुरस्कारा खातीर पुरस्कृत जालां, कोणें केलां, कित्याक केलां तेंय सांगूक जाय आनी तो पुरस्कार तुमी घेतले काय ना तेंय विचारून लेखकाची मान्यताय घेवंक जाय अशें अकादेमीक दिसलें ना? आनी पुरस्कार जाहीर करतना ते दोन गटांनी येवंक नाका आसले? मागून घेतिल्ल्यांचो एक आनी मागनासतना दिल्ल्यांचो एक गट जावंक नाका आसलो? सगळ्यांनीच मागल्यात असो आतां समज जातलो न्ही? तातूंत तंत्रीक नदरेन म्हज्या सपनांतलो गांव पुस्तकाक पुरस्कार मेळूंक फावना काय दिसता. ज्या पुस्तकाक अकादेमीन अनुदान दिलां त्या पुस्तकाक अकादेमीचो पुरस्कार कसो मेळूं येता? म्हाका विचारिल्लें तर हांव हें सांगपाचों. आनी दिवंक मेळटा आसलो तरीय हांव हो पुरस्कार घेवचो ना.
कारण हे पुरस्कार चार फेब्रुवारीक म्हणल्यार राजभास मान्यताये दिसा दितात. गोंयच्या मुखेलमंत्र्या हातान दितात, जाका सगळ्यो भासो सारक्योच. आडटीस वर्सां फाटल्यान कोंकणीक राजभास म्हणून मान्यताय मेळ्ळी. फक्त मान्यताय मेळ्ळी, मुखार कितें? कायदो चालीक लायलो? अजून तरी ना काय दिसता. तो फायलिंनी तसोच बंद आसा. आमी दर वर्सा याद काडपाची, दीस मनोवपाचो आनी हजारांचे पुरस्कार घेवन खोशी मनोवपाची. हातांत हजार पडटकूच सरकाराक कोण जाप विचारतले? सरकार कोंकणीचेर, कोंकणी लोकांचेर अन्याय करीत आसा. सरकारान उबी केल्ली कोंकणी अकादेमीच अजून जाग्यार पडना. अकादेमीक स्वताच्या मालकीचें कार्यालय अजून मेळना. ती हांगा थंय भाड्याच्याच जाग्यार भोंवता. अकादेमीक एक अध्यक्ष दिवंक सरकाराक जमना आनी कोण ताचेर आवाजूय काडिनात. अकादेमींतल्यान एकेकलो रिटायर जायत आसा, पूण ते जागे भरिल्ले दिसनात. अकादेमीक संशोधकाचो जागो गरजेचो हें तरी सरकाराक खबर आसा? सरकाराक कोंकणीय सारकी, मराठीय सारकी आनी इंग्लीश तर गरजेची. फुडाराक कानडी, उर्दू, गुजराथीय सारकीच म्हणून ताचोय आस्पाव केलो म्हणून अजाप जावपाची गरज ना.
आनी अश्या सरकाराचे पुरस्कार आमी घेवपाचे? खरें तर हांव हें चार तारकेर कार्यावळीक येवनूच सांगपाचों. पूण जांणी व्हड यत्न करून पुरस्कार घेतल्यात तांचे कार्यावळींत विरजण कित्याक घालूं? घेवं तांकां पुरस्कार आनी मनोवं तांकां खोशी ह्याच विचारान फाटीं सरलां. पूण हांव पुरस्कार घेवचो ना. हांव म्हजे पुरतो निशेध व्यक्त करतां. जांणी कोणे म्हजी याद करून पुरस्कारा खातीर नांव दिलें, जांणी अभिनंदनाचे फोन आनी मॅसेजी धाडल्यो त्या सगळ्यांक दिनवास. राजभास कायदो चालीक लावपाची सरकाराक बेगीन बुद्द मेळची इतलीच इत्सा.

अभयकुमार वेलींगकार
9423884687