भांगरभूंय | प्रतिनिधी
केंद्रीय प्रदुशण नियंत्रण मंडळाचे राज्य मंडळाक आदेश
पणजी : प्लास्टीक कोयर तयार करपी आस्थापनां तशेंच प्लास्टिकाची हाताळणी करपी एजन्सींचे पर्यावरणी मोलावणी ऑडीट अहवाल 15 दिसांत सादर करपाचो आदेश केंद्रीय प्रदुशण नियंत्रण मंडळान राज्य प्रदुशण नियंत्रण मंडळाक दिला. पर्यावरणी नेम मोडपी कितल्या जाणांचेर कारवाय केली, ताचोय उल्लेख अहवालांत आसपाक जाय, अशें मंडळान स्पश्ट केलां.
केंद्रीय प्रदुशण नियंत्रण मंडळान सगल्या राज्यांच्या प्रदुशण नियंत्रण मंडळाक हे आदेश दिल्यात.
पर्यावरणी जतनाय कायद्याच्या कलम 5 खाला प्लास्टीक तयार करपी वा प्लास्टिकाची हाताळणी करपी आस्थापनांक मार्गदर्शक तत्वांक पालव दिवचो पडटा. मार्गदर्शक तत्वांक पालव दिलो ना, जाल्यार नेमा प्रमाण प्रदुशण नियंत्रण मंडळान दंड घालचो पडटा. तशेच प्लास्टीक हाताळणी करपी जागो आनी मशिनरीची पळोवणी करची पडटा. जागो वा मशिनरी खातीर पर्यावरण दुशीत जाता, जाल्यार योग्य ती कारवाय करप आवश्यक आसता.
केंद्रीय प्रदुशण मंडळान सगल्या राज्यांच्या प्रदुशण नियंत्रण मंडळाक हे विशीं सुचोवण्यो तशेंच आदेश दिल्यात. प्लास्टीक तयार करपी कंपनीं तशेंच प्लास्टीक कोयरा सयत प्लास्टिकाची हाताळणी करपी एजन्सीच्या सुविधांची पळोवणी करप मंडळांक बंधनकारक आसा. पळोवणी आनी कारवाये विशीं अहवाल सादर करपाचे आदेश केंद्रीय प्रदुशण नियंत्रण मंडळान (सीपीसीबी) हाचे पयलींच दिल्ले. हे विशीं गोंया सयत हेर राज्यांनी अहवाल सादर करूंक ना.
प्लास्टीक तयार करपी कंपनीं तशेंच प्लास्टीक कोयराची हाताळणी करपी एजन्सीची पळोवणी आनी कारवाय हे विशींचो ऑडीट अहवाल 15 दिसांत सादर करपाचे आदेश नव्यान केंद्रीय प्रदुशण नियंत्रण मंडळान दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
