मुरगांव उड्डाणपुलाचें उक्तावण करपा खातीर केंद्रीय मंत्री नितीन गडकरी गोंयांत
भांगरभूंय | प्रतिनिधी
3500 कोटी रुपयांच्या हेर पांच प्रकल्पांचो आयज बुन्यादी फातर घालतले
पणजी ः मुरगांव रविंद्र भवन ते एमपीटीक जोडपी 644 कोटी रुपयांच्या उड्डाणपुलाचें उक्तावण करपा खातीर केंद्रीय रस्तो आनी म्हामार्ग मंत्री नितीन गडकरी आयज दनपारां गोंयांत पावलें. दाबोळे विमानतळार तांकां शिष्टाचार मंत्री माविन गुदिन्हो, मुरगांवचे आमदार संकल्प आमोणकार, प्रदेश भाजप अध्यक्ष दामू नायक आनी हेरांनी येवकार दिलो.
उड्डाणपुलाचें उक्तावण करपा वांगडाच सुमार 3500 कोटी रुपयांच्या हेर पांच प्रकल्पांचो बुन्यादी फातर घालपाचें केंद्रीय मंत्री नितीन गडकरी हांचें हस्तुकीं जातलें. आयज मंगळारा सांजवेळा 6 वरांचेर वास्को रवींद्र भवना लागसार एलिवेटेड रस्त्यार उक्तावण सुवाळो जातलो. मुख्यमंत्री डॉ. प्रमोद सावंत, केंद्रीय ऊर्जा मंत्री श्रीपाद नायक, सभापती रमेश तवडकार, येरादारी मंत्री मावीन गुदिन्हो, वीज मंत्री सुदीन ढवळीकार, कायदो मंत्री आलेक्स सिक्वेरा, दक्षीण गोंयचे खासदार विरियातो फर्नांडिस, आमदार कृष्ण साळकार, आमदार संकल्प आमोणकार, आमदार अंतोनियो वाझ आनी हेर मानेस्त ह्या वेळार हाजीर आसतले.
एमईएस महाविद्यालय ते बोगमाळो जंक्शन मेरेन फ्लायओव्हर (472 कोटी), जुवारी ते मडगांव बायपास मेरेनच्या रस्त्याचे चौपदरीकरण (398 कोटी), नावेली ते कुंकळ्ळें रस्त्याचे चौपदरीकरण (747 कोटी), बेंदोर्डे ते पोळे रस्त्याचे चौपदरीकरण (1376 कोटी) आनी फोंडें ते भोमा रस्त्याचे चौपदरीकरण (557 कोटी) ह्या कामांचो बुन्यादी फातर ह्या वेळार बसयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
