भांगरभूंय | प्रतिनिधी
नवी दिल्ली, खबरां संस्था: रेल्वे सुरक्षा दळान (आरपीएफ) २०२१ सावन वट्ट ९१६ व्यक्तींक अटक केल्या. जातूंत ५८६ बांगलादेशी नागरीक आनी ३१८ रोहिंग्यांचो आसपाव आसा.
ऑक्टोबर २०२४ त प्रकाशीत अहवालां प्रमाण, बांगलादेशी शिमेंत सुरक्षा उपाय वाडोवपाच्या यत्ना उपरांतूय, अवैध स्थलांतरीत भारतांत प्रवेश करतात. मुखेलपणान आसाम मार्गान आनी रेल्वेचो वापर हेर राज्यांनी प्रवास करपा खातीर एक मुखेल मार्ग म्हणून करता. हो घटनाक्रम भारतीय प्राधिकरणां मुखार एक म्हत्वाचें आव्हान उबें करता. कारण रेल्वे नेटवर्काचेर अवैध प्रवेश आडावपा खातीर खर सुरक्षा उपाय राबयतात. रेल्वेचो वापर करून स्थलांतरितांची हालचाल एक राज्यांतल्यान दुसर्या राज्यांत जावपाक मजत जाता, जाका लागून अनधिकृत प्रवेशाची खोल तपासणी करप सामकें कठीण जाता.
हे समस्येचेर नियंत्रण मेळोवपा खातीर, रेल्वे सुरक्षा दळान सीमा सुरक्षा दळ (बीएसएफ), थळावे पुलीस आनी गुप्तचर यंत्रणां वांगडा समन्वय वाडयलां. ह्या आंतरसंस्थात्मक सहकार्याक लागून तांचे कार्यक्षमतेंत सुदारणा जाल्यात. जाका लागून अवैध स्थलांतरितांची वळख आनी तांकां रोखडेंच अटक करप शक्य जालां. मात रेल्वे सुरक्षा दळाक धरिल्ल्या व्यक्तीं आड न्यायीक प्रक्रिया सुरू करपाचे अधिकार ना. ताचे बदला धरिल्ल्या व्यक्तींक पुलीस आनी हेर संस्थां कडेन दितात, जे फुडले कायदेशीर कारवाये खातीर जापसालदार आसतात.
बांगलादेश, म्यानमार ह्या शेजारच्या देशांतली राजकीय अस्थिरताय आनी भुगोलीक परिस्थिती तशेंच ह्या वाठारांतल्या समाजीक-धमीर्र्क घटकांक लागून भारतांत आलाशिरो, रोजगार आनी राबितो सोदपा खातीर येवपी लोकांचो आंकडो वाडला. हो एक गंभीर राश्ट्रीय सुरक्षा हुस्को जावन पडला. रेल्वे नेटवर्काचो वापर करून अवैध स्थलांतरितांचो अचूक आंकडो जरी उपलब्ध आसा तरी, हालीं अहवाल दाखयतना अवैध स्थलांतरीत रेल्वे नेटवर्कचो वापर करून आसाम आनी त्रिपुरा सारख्या राज्यांतल्यान हेर वाठारांनी वतात.
रेल्वे संरक्षण दळान हो म्हत्वाचो प्रस्न हाताळपाचें आव्हान घेतलां आनी भारताचे शिमेचेर प्रवेश करपी बेकायदेशीर स्थलांतरीतांक वळखुपाक आनी तांकां धरपाक म्हत्वाची भुमिका साकारल्या. हे व्यक्ती फकत राश्ट्रीय सुरक्षितताये खातीर धोको न्हय, पूण सक्तीन काम करप, घरगुती काम, शिदळकी वेवसाय, मनशाच्या अवयवांच्या वेपारा खातीर शोशण ह्या गुन्यांवांनीय तांचो आस्पाव आसूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
