भांगरभूंय | प्रतिनिधी
भांगरभूंय । खबरां मेज
पणजी : कोंकणी भाशा मंडळ आयोजीत गोवा युवा महोत्सवाच्या आदल्या कार्याध्यक्षांनी गठीत केल्लो प्रतिश्ठेचो ‘युवा उर्बा पुरस्कार’ ह्या वर्सा युवा वावुरपी, संयोजक आनी लोककलाकार नंदन कुंकळ्येंकार हांकां जाहीर जाला. सर्वण- दिवचलच्या नारायण झांट्ये वाणिज्य म्हाविद्यालयांत शेनवार 25 आनी आयतार 26 जानेवारीक 26 वो युवा महोत्सव जाता. ताच्या उक्तावण सुवाळ्यांत मुख्यमंत्री डॉ. प्रमोद सावंत हांचे हस्तुकीं हो पुरस्कार नंदन हांकां भेटयतले.
महोत्सवाचे माचये वेल्यान कोंकणी चळवळींत पावल दवरून फुडाराक विंगड विंगड मळांचेर मोलादीक योगदान दिवपी युवकाक हो पुरस्कार भेटयतात. पयलो पुरस्कार नाट्य लेखक आनी अभिनेत्री सुचिता नार्वेंकार हांकां पंचविसाव्या युवा महोत्सवांत भेटयिल्लो. आदल्या कार्याध्यक्षांचे बसकेंत ह्या पुरस्कारा खातीर योग्य व्यक्तीची निवड जाता.
नंदन कुंकळयेंकार हांचो कोंकणी लोकवेद संकलन आनी सादरीकरणांत मोलादीक वावर आसा. गोवा युवा महोत्सवांतल्यान प्रेरणा घेवन फाटलीं धा वर्सां कुंकळ्यें सारख्या गांवगिऱ्या वाठारांत साबार आव्हानां पेलत नंदन आपल्या शांतादुर्गा विजयते कला मंडळ संस्थे वतीन ‘उर्बा’ हो संस्कृतीक उत्सव आयोजीत करता. कोंकणी चळवळींत तरनाट्यांक लागीं हाडपाचो आनी तांकां सक्रीय वावरा खातीर प्रेरीत करपाचो मोलाचो वावर ते करतात. नंदन हांकां हाचे आदीं भांगराळें गोंय अस्मिताय संस्थेन ‘नित्य युवा पुरस्कार’ भेटयला तशेंच गोवा कोंकणी अकादेमीचो 2024 वर्साचो ‘युवा चैतन्य पुरस्कार’ तांकां हालींच जाहीर जाला.
कोंकणी नाट्य सादरीकरण, कोंकणी आरती रचना, सूत्रसंचालन, लोकनृत्य सादरीकरण अशे विंगड विंगड प्रकार तांणी हातांत घेतल्यात. तशेंच राज्यांतल्या साबार विद्यालयांनी तांणी लोकनृत्य कार्यशाळो घेतल्यात. वेलींग, प्रियोळ, कुंकळ्यें ह्या वाठारां पुरती सिमीत स. रवीन्द्र केळेकार यादस्तीक कथाकथन सर्त आयोजीत केल्या. नंदनान ‘मार्टीन’ ह्या कोंकणी चित्रपटांत भुमिका केल्या. ‘होम स्वीट होम’ ह्या चित्रपटा खातीर बॅक स्टेज संगीत कलाकार म्हुणूनय काम पळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
