भांगरभूंय | प्रतिनिधी
खबरां संस्था
सिंगापूरः भारताची शटल क्वीन पीव्ही सिंधून सिंगापूर ओपन सर्तींत बायलांचे एकोडीचें वस्तादपण मेळयलें. दोन फावट ऑलिम्पीक भांगरा पदकां मेळोवपी सिंधून आयतारा जाल्ले फायनलींत चीनाच्या वांग झी यीक 21-19, 11-21, 21-15 अशें हारयलें.
संवसारीक क्रमवारींत सातवे सुवातेर आशिल्ल्या सिंधून उपांत्य फेरयेंत जपानाच्या बिनसिडेड सायना कावाकामीकाक सरळ सेटांत हारयल्लें. सिंधून ही मॅच 21-15, 21-7 अशी जिखल्ली. सिंधू खातीर संवसारीक क्रमवारींत 11वे सुवातेर आशिल्ल्या वांग झी यीक हारोवप तितलें सोपें नाशिल्लें. तीन सेट मेरेन चलिल्ले हे मॅचींत सिंधून जैतान सुरवात केली. पयल्या सेटांत ताणे चीनाच्या वांग हाका 21-9 अशें हारयलें. दुसऱ्या सेटांत वांग झी यीन आक्रमक खेळ करून हो सेट 21-11 असो जिखून बोरोबोरी केली.
तिसरो सेट सामको उमळशीक वाडोवपी जालो. सुरवेक 8-10 गुणां मेरेन दोनूय खेळगडीं मदीं चुरस दिसली. मात सिंधू लव्हू लव्हू खेळाचेर पकड घेत हो सेटे 21-15 अश्या फरकान जिखून आपल्या जैताचेर म्होर लायली.
मजगतीं, महाराष्ट्राचे उपमुख्यमंत्री देवेंद्र फडणवीस हांणी पीव्ही सिंधूक परबीं भेटयल्यांत. सिंधून भारता खातीर एक बरी बामती दिल्या. तिणे परत एक फावट आपली मान अभिमानाक उंच केल्या. देशांतल्या कोट्यांनी लोकाक सिंधून प्रेरणा दिल्या अशें तांणी आपल्या ट्विटांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
