भांगरभूंय | प्रतिनिधी
10 टक्के हातांच्यो शस्त्रक्रिया गोमॅकॉच्या दोतोरां खातीर आसता आव्हान
भांगरभूंय । प्रतिनिधी
पणजी : स्वीस फावंडेशनाच्या जीकॅम वतीन र्गोंय वैजकी म्हाविद्यालयांत 50 जाणांच्या हातांचेर किचकिटीच्यो शस्त्रक्रिया जातल्यो. शिबिराच्या पयल्या दिसा सोमारा 4 जाणांचेर शस्त्रक्रिया जाल्यो. पुराय शिबिरांत 50 जाणांचेर शस्त्रक्रिया जातल्यो, अशी म्हायती गोंय वैजकी म्हाविद्यालय हॉस्पिटलाचे डीन डॉ. शिवानंद बांदेकार हांणी दिली.
डॉ. मार्को लँझेटा बर्तानी (स्वीत्झर्लंड), जीओवन्नी विटले (इटली), अलेस्ला मोरेथ ह्या तज्ञांनी ह्यो शस्त्रक्रिया केल्या. गोंय वैजकी म्हाविद्यालयाच्या प्लास्टीक सर्जरीचे मुखेली डॉ. युरी डायस आनी हेर दोतोरांनी लेगीत शस्त्रक्रियेंत वांटो घेतलो.
स्वीस फावंडेशनाच्या जीकॅम वांगडा गोंय वैजकी म्हाविद्यालयान कबलात केल्या. जीकॅमचे तज्ञ दोतोर गोंय वैजकी म्हाविद्यालयांत येवन हातांच्यो किचकिटीच्यो शस्त्रक्रिया करतात.
गोंय वैजकी म्हाविद्यालय हॉस्पिटलांत जावपी हें दुसरें शिबीर आसा. पयल्या शिबिरांत 4 जाणांच्या हातांचेर शस्त्रक्रिया केल्यो. जीकॅम दोतोर गोंय वैजकी म्हाविद्यालयाचे विद्यार्थी तशेंच दोतोरांकूय मार्गदर्शन करतात. सध्या जीकॅम दोतोरांचें दुसरें शिबीर चालू आसा. 25 जानेवारी मेरेन शिबीर चलतलें. पयल्या दिसा जीकॅमच्या दोतोरांनी 60 दुयेतींच्या हातांची तपासणी केली. तपासणी उपरांत 4 जाणांच्या हातांचेर शस्त्रक्रिया केल्यो. मॅलिगनेसी ऑफ हँड, न्युरोफायब्रोमेटोसीस, रिकरंट ड्युपट्रेन कॉन्ट्रॅक्चर हॅंड हे विशीं ह्यो शस्त्रक्रिया आशिल्ल्यो. पुराय शिबिरांत आनीक 46 शस्त्रक्रिया करपाचें लक्ष्य आसा.
गोंय वैजकी म्हाविद्यालयांतले ऑर्थोपेडीक दोतोर सगळे तरेच्यो शस्त्रक्रिया करतात. तरी 10 टक्के शस्त्रक्रिया ह्यो गोंय वैजकी म्हाविद्यालयांतल्या दोतोरां खातीर आव्हान आसता. ह्या शस्त्रक्रियां खातीर तज्ञांचो सल्लो वा मजत गरजेची आसता. ह्यो किचकिटीच्यो शस्त्रक्रिया जीकॅमच्या शिबिरांत जाता, अशें डीन डॉ. शिवानंद बांदेकार हांणी सांगलें. दरवर्सा स्वीस फावंडेशनाच्या जीकॅमचे दोतोर गोंय वैजकी म्हाविद्यालयाक भेट दिवन किचकिटीच्यो शस्त्रक्रिया करतले. दुयेंती सयत विद्यार्थी तशेंच दोतोरांक हाचो लाव जातलो. जीकॅमचे 5 ते 6 दोतोर ह्यो शस्त्रक्रिया करतात. शस्त्रक्रिया केल्ल्या सगळ्या दुयेंतींची भलायकी थीर आसा, अशें प्लास्टीक सर्जरी फांट्याचे मुखेली डॉ. युरी डायस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
