भांगरभूंय | प्रतिनिधी
देर अल-बलाह, खबरां संस्था: इस्रायल आनी हमास मदल्या झुजान आयतारा सावन विसव घेतला. गाझांत वट्ट १५ म्हयन्यां उपरांत शांतिकाय पातळपाची आस्त निर्माण जाल्या. झुजाच्या विसवाच्या करारा प्रमाण पयल्या टप्प्यांत स सप्तकांच्या काळांय झूज थारायतले, तशेंच हमासच्या ताब्यांतल्या ओलिसांची आनी इस्रायलच्या ताब्यांतल्या पॅलेस्टिनी कैद्यांची सुटका करतले.
आदल्या निर्धारीत वेळापत्रका प्रमाण थळाव्या वेळा प्रमाण आयतारा सकाळीं ८.३० वरांचेर करार अंमलात येवपाचो आशिल्लो. मात, हमासान निमण्या खिणाक सुटका करपी तीन ओलिसांची नांवां जाहीर करूंक नाशिल्ल्यान कराराची अंमलबजावणी जावपाक तीन वरां कळाव जालो आनी कांय प्रमाणांत अनिश्चीतताय निर्माण जाली. हमासान ह्या ओलिसांचीं नांवां सकाळीं ८.३० पयलीं जाहीर करप अपेक्षीत आशिल्लें. निमाणें दोन वरां उपरांत नांवां जाहीर केलीं आनी सकाळीं सुमार ११.१५ वरांचेर करार लागू जालो. ह्या दोन वरांच्या काळांत इस्रायलान केल्ल्या हल्ल्यांत २६ पॅलेस्टिनींक मरण आयलां अशें गाझाच्या अधिकार्यांनी सांगलें.
हमासान ७ ऑक्टोबर २०२३ त केल्ल्या हल्ल्यांत सुमार १,२०० इस्रायली नागरीकांक मरण आयिल्लें. तशेंच हमासान २५० जाणांचें अपहरण करून तांकां लिपोवन दवरिल्ले. हातूंत कांय परदेशी नागरिकांचोय आसपाव आसा. तांतल्या कांय ओलिसांक मरण आयिल्ल्याचें समजलें.
हमासच्या हल्ल्याक प्रत्युत्तर म्हणून इस्रायलान ८ ऑक्टोबर सावन गाझाचेर हल्ले करपाक सुरू केले.ह्या झुजाक लागून गाझाच्या २३ लाख लोकसंख्ये मदले सुमार २० लाख लोक विस्थापीत जाले. तशेंच इस्रायलच्या हल्ल्यांत ४६,९१३ पॅलेस्टिनींक मरण आयलें जाल्यार १,१०,७५० जखमी जाल्ल्याची माहायती पॅलेस्टायनच्या भलायकी मंत्रालयान दिली. मरण आयिल्ल्या आनी जखमी जाल्ल्यां मदीं चडसो बायलांचो आनी भुरग्यांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
