भांगरभूंय | प्रतिनिधी
चवगांक अटक, कोटी परस व्हड स्कॅम शक्यः उत्तर गोंय पुलीस अधिक्षक
भांगरभूंय । प्रतिनिधी
पणजीः 2022 सावन चलत आयिल्लो ‘हॉटेल स्कॅम’ गोंय पुलिसांनी उक्तडार हाडलां. वेबसायटीचेर अस्तित्वांत नाशिल्ल्या हॉटेलांचीं नांवां घालून ते पर्यटकां कडल्यान बुकिंगेचें पयशे घेताले. पुलिसांनी ग्वाल्हेराच्या एकल्याक जाल्यार हैदराबादाच्या तिगांक मेळून चवगांक अटक केल्या. ह्या स्कॅमाची खोलयेन चवकशी चालू आसा. हो एक कोटी परस चड व्हड स्कॅम आसपाची शक्यताय आसा, अशें उत्तर गोंय पुलीस अधिक्षक अक्षत कौशल हांणी सांगलें.
ह्या स्कॅमाची म्हायती दिवपा खातीर पुलीस अधिक्षक अक्षत कौशल हांणी पणजी पुलीस मुख्यालयात पत्रकार परिशद घेतली. ह्या वेळार भारतीय पुलीस सेवेचे (आयपीएस) अधिकारी मयंक दुबे आनी अरूण बलगोत्रा हजर आशिल्लें.
दुबावित स्वता हॉटेल धनी आशिल्ल्याचें दाखोवन अस्तित्वांत नाशिल्ल्या हॉटेलांचीं नांवां आनी फोटो बुकींग डॉट कॉम सारकिल्ले अधिकृत वेबसायट आनी अनधिकृत वेबसायटीचेर घालताले. हेर हॉटेलांचे तुळेंत हे दुबावित बंगले आनी हेर हॉटेला कमी आनी आकर्शक किमतीत दिवन गिरायकांक हांयस दाखयताले. पर्यटक ह्या अस्तित्वांत नाशिल्ल्या हॉटेलांक बळी पडले उपरांत तांचे कडल्यान एडव्हान्स पयशे घेवन गायब जाताले, अशीं म्हायती कौशल हांणी दिली.
जेन्ना चंदीगडचे पर्यटक पंकज धिमान हांणी हे विशीं कागाळ केली तेन्ना हो स्कॅम उक्तडार आयलो. तांणे रुबी व्हीला हे हॉटेल बुक करून तांका रु. 20 हजार दिल्लें. जेन्ना तो थळार पावलो तेन्ना ताका कळ्ळें की जो बंगलो तांणे बुक केल्लो तो अस्तित्वांतच नाशिल्लो. उपरांत धिमान हांणी हणजूण पुलीस स्टेशनांत कागाळ नोंद केली.
उपरांत आयपीएस अधिकारी मयंक दुबे आनी अरूण बलगोत्रा हांच्या फुडारपणा खाला हणजूण पुलीस स्टेशनाचे पुलीस निरिक्षक सुरज गावस, पुलीस उपनिरिक्षक साहील वारंग, रमेश हरीजन, साई आनी कळंगुट पुलीस स्टेशनाचे शिपाय राज परब आनी विद्या हांचो एक पंगड तयार करून तिग जाण हैदाराबाद आनी एकल्याक जयपुराक अटक करून चार जाणांक उखल्लें, अशें कौशल हांणी सांगलें.
आरोपी सौरभ (ग्वालियर), सयद्द अली मुख्तार, मोहमद फिरोज आनी मोहमद अझरूद्दीन सैफ (तिगूय रावपी हैदाराबाद) हांका अटक केल्या. हो स्कॅम केल्ल्याचे तांणी कबूल करून हैदाराबाद एक भाड्याचे कुडींत ते हें रॅकेट चलयताले अशें सांगलें. बायलां कर्मचारी दवरून 15 वेगवेगळ्या बँक खात्यांत ते पयशे धाडपाक लायताले. ती सगळी बँक खाती गोठल्यात, अशी म्हायती कौशल हांणी दिली.
अश्योच खुबश्यो ऑनालयान फटणुकीच्यो कागाळी गोंय पुलिसां कडेन आयल्यात. हे विशीं खोलायेन तपास करतात. सुमार 500 पर्यटक ह्या स्कॅमात बळी पडल्यात हें दिसून आयलां. तांचे कडेन संपर्क सादून तांच्यो कागाळी नोंद करपाचे यत्न सुरू आसात. हो स्कॅम 2022 सावन चालू आसा. हो कितलो व्हड स्कॅम आसा हाचोय तपास चालू आसा. आमच्या म्हायती प्रमाण हो एक कोटी परस चड व्हडले रकमेचो स्कॅम आसपाक शकता, अशें कौशल हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
