भांगरभूंय | प्रतिनिधी
पेडणें: आदल्या काळार रानांनी रानवटी जनावरां रावतालीं आनी मनशां गांवांनी रावताले. मात आयज काळ बदल्ला. रानां, दोंगर कापून थंय व्हड प्रमाणांत कॉंक्रिटाचीं रानां उबीं जावपाक लागल्यांत. जनावरांक रावपाक सुवात ना. हाका लागून रानवटी जनावरां लोक वस्तेंत येवन व्हडा प्रमाणांत शेतांचो इबाड करतना सगळ्याक पळोवपाक मेळटा. सरकारान गव्यांचो बंदोबस्त करचो, अशी मागणी शेतकरी उदय महाले हांणी केल्या. सध्या हंसापूर, कासारवाणी, चांदेल, हळर्ण वाठारांत व्हडा प्रमाणांत गवे दिसाचे तशेंच रतचे येवन शेतांची वाट लायतना दिसतात.
चांदेल, हंसापूर ह्या वाठारांनी सध्या गव्यांचें कळप व्हडा प्रमाणांत शेतांनी, बागायतींनी येवन व्हडा प्रमाणांत लुकसाण करता अश्यो थळावे कागाळी करतात. ह्या गव्याक लागून पिकांचें लुकसाण जाल्ल्यान शेतकार्यांचेर अर्थीक ताण येता अशी म्हायती शेतकरी उदय महाले हांणी दिली. हाता तोंडा कडेन आयिल्लें पीक गव्यांक लागून नश्ट जाल्ल्यान शेतकार चिंतेस्त जाल्यात. हे परिस्थिती कडेन व्यापक नदरेन पळोवप गरजेचें जालां.
रानवटी जनावरां पसून शेती बागायतीक दर वर्सा व्हडा प्रमाणां धोको निर्माण जाता. हाका लागून कांय शेतकार शेती बागायती कडेन वळपाचें सोडून आपलीं शेतां पडींग दवरतात. शेती खात्यान, रान खात्यान हाचे कडेन लक्ष दिवन ह्या गव्यांचो बंदोबस्त करपाचो अशी मागणी शेतकार आनी थळावे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
