भांगरभूंय | प्रतिनिधी
सांखळे मराठी राजभाशा संमेलनाचें उक्तावण
दिवचल ः मराठीक राजभाशेचो दर्जो नासलो तरी दुय्यम स्थान दिवंक ना. कोंकणी वांगडा मराठीकूय सरकार सगल्या पांवड्यांचेर समान न्याय दिता. तिचे जडणघडणी खातीर सगलो पालव सरकार दिता. हांव १९९७ सावन मराठी चळवळींत आसां. आतां मुख्यमंत्री जालों तरी म्हाका मराठी विशीं आपलेंपण आसा. सध्या कोंकणी आनी मराठी हातांत हात घालून नंदतात, तेन्ना कसल्याय प्रकाराचो भाशीक वाद करपाची गरज ना, अशें मुख्यमंत्री दो. प्रमोद सावंत हांणी सांगलें. सांखळे आयोजित केल्ल्या मराठी राजभाशा साहित्य संमेलनाचे उद्घाटक ह्या नात्यान ते उलयताले.
मुळाव्या पांवड्याचेर थळाव्या भाशांक उर्बा दिवप गरजेचें आसा. प्रधानमंत्री मोदीजींनी थळाव्या भाशांक उर्बा दितना मराठीक अभिजात भाशेचो दर्जो दिला. म्हजें मराठीक सदांच सहकार्य मेळटलें. नव्या शिक्षण धोरणांत मायभाशेंत शिक्षण दिवपाचेर भर दिला. वेवसायीक शिक्षणूय मायभाशेंतल्यान दिवपाक जाय, हे खातीर सरकार यत्न करता. थळाव्या भाशांचें म्हत्व युवा पिळग्यांक पटोवन दिवपाची गरज आसा, अशें दो. सावंत हांणी सांगलें.
राज्यांतल्यो मराठी शाळा सरकाराक लागून बंद जाता, अशो थपको सगले सरकाराचेर दवरतात. पूण एकूय शाळा सरकारान बंद करूंक ना. आयज पालकांची ओड इंग्लिशी कडेन वाडिल्ल्यान मराठींत शिकपी विद्यार्थ्यांचो आंकडो उणो जायत आसा. इंग्लिशीक माथ्यार घेवन नाचिल्ल्यान प्रत्यक्षांत भुरग्यांक मराठी आनी कोंकणीय भाशा कळना जाल्या, अशी खंत दो. सावंत हांणी उक्तायली. सगल्यांनी इंग्लीश शिकचीच, पूण हेर भाशांचें गिन्यानूय तांकां आसचें. मायभास तर बरोवंक, वाचूंक आनी उलोवंक येवपाकूच जाय. खंयचेच मुळावे शाळेचेर आमी अन्याय करूंक ना. इंग्लीश माध्यमाच्या शाळांक मात अनुदान दिवंक ना. मायभाशेंतल्यो मुळाव्यो शाळा बळिश्ट करपाक सरकार सगले यत्न करता, अशें तांणी स्पश्ट केलें.
सरकार कोंकणी, मराठी भाशांक अनुदान दिता. आदले मराठी अकादमीकूय कार्यावळी करपाक पालव दितले, अशें दो. सावंत हांणी सांगलें.
गोमंतक मराठी अकादमी आनी मराठी असे आमुची मायबोली आयोजित हें दुसरें मराठी राजभाशा साहित्य संमेलन साखळेच्या राधाकृष्ण मंदिर सभाघरांत जालें. उद्घाटन मुख्यमंत्री दो. प्रमोद सावंत हांणी केलें.
माचयेर संमेलनाध्यक्ष राजेंद्र केरकार, कार्याध्यक्ष ॲड. यशवंत गांवस, स्वागताध्यक्ष अशोक घाडी, मुखेल कार्यवाह उदय ताम्हणकार, आदले आमदार नरेश सावळ, गोमंतक मराठी अकादमीचे अध्यक्ष प्रदीप घाडी आमोणकार, मराठी असे आमुची मायबोलीचे मुखेली प्रकाश य. भगत, गोमंतक मराठी भाषा परिषदेचे अध्यक्ष मधू घोडकिरेकार तशेंच हेर मानेस्त माचयेर हाजीर आशिल्ले.
गोंयांत १३ व्या शेंकड्यांत खांडोळ्यां ताम्रपट मेळ्ळा. मराठी गोंयांतल्यान महाराष्ट्रांत गेली अशें प्रा. राजेंद्र केरकार हांणी सांगलें. आदल्या तेंपार मराठी खातीर जायत्या जाणांनी आंदोलन केलें. आतां मराठीचो बावटो तेंगशेर हुबोवपाक नवे पिळगेन योगदान दिवपाची गरज आसा. तांणी वाचन, अभ्यास, लेखन करपाची गरज आसा. ८ कोटी वयर लोक मराठी उलयतात. संवसारीक पांवड्याचेर ती तेराव्या स्थानार आसा, अशेंय तांणी सांगलें. म्हादयच्या लढ्यांत सगल्यांनी वांटेकार जावचें, असो उलोय तांणी मारलो.
ह्या वेळार हेर मानेस्तांचींय उलोवपां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
