भांगरभूंय | प्रतिनिधी
फोंडें: तिस्क-उसगांव ते खांडेपार मेरेनच्या राष्ट्रीय म्हामार्गार अपघाताचें सत्र चालूच आसा. अपघातांत जायत्या जाणांक मरणूय आयलां. अपघात आडावपा खातीर पार -उसगांव ते तिस्क-उसगांव मेरेनच्या बगल रस्त्यार उडाण पूल उबारपाचो म्हत्वाचो थाराव उसगांव पंचायतीचे ग्रामसभेंत आयतारा घेतलो.
सरपंच रामनाथ डांगी हांचे अध्यक्षते खाला जाल्ले ग्रामसभेंत पंचायतीचे सचीव मयूर कुडाळकार आनी हेर पंच वांगडी हजर आशिल्ले.
अपघाताचेर नियंत्रण येवपा खातीर खर उपाय काडप सामकें गरजेचें. थळावे पंचायती वरवीं ह्या वाठारांत उड्डाणपूल उबारपाचो थाराव बांदकाम खात्याक तशेंच राष्ट्रीय महामार्ग खात्याकडेन पावोवप गरजेचें. जाल्यारूच ह्या मार्गावेल्या अपघातांचेर नियंत्रण येवपाक शकता. उडाण पूल उबारतना मदीं खांबो उबारपाची गरज आशिल्ल्याचो थाराव ह्या वेळार ग्रामस्थांनी घेतलो.
उसगांव वाठारांत जायत्यो उद्ेगीक वसणुको कार्यरत आशिल्ल्या कंपन्यांनी थळाव्यांक रोजगार मेळप गरजेचें. फाटल्या कितल्याशाच वर्सां सावन ग्रामसभेंत परत परत प्रस्न हजर करतात. मात उद्देगीत वसणूक कार्यरत कंपन्यांनी हेर भागांतल्या कामगारांची भरती करतात. थळाव्या पंचायतीन हे विशीं ठोस उपाय करपाची मागणी करून ग्रामस्थांनी गरजेचो थाराव घेतलो.
फाटल्या पंचायत सचिवा आड विनयभंगाची कागाळ पुलीस स्टेशनांत नोंद जाली. तशेंच पंचायती वरवीं केल्ल्या सर्वेक्षणां विशीं चर्चा केली. हाचेर सरपंच रामदास डांगी हांणी दिल्ले जापेचेर ग्रामस्थांनी समाधान उक्तायलें.
सरपंच रामनाथ डांगी हांणी ग्रामसभे वांगडा पंचायत मंडळूय उड्डाण पूल उबारपा खातीर थाराव घेवन संबंदीत खात्याक धाडटलें. थळाव्यांक उद्देगीक वसणुकेंतूय रोजगार दिवपा खातीरूय कंपनीच्या अधिकार्यां कडेन चर्चा करतले. तशेंच सर्वेक्षणा विशीं चड म्हायती दितना सगळ्या घरांचें सर्वेक्षण पंचायती वरवीं केल्ल्याचें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
