भांगरभूंय | प्रतिनिधी
म्हापसा : केरी- पेडण्या जाल्ल्या पॅराग्लायडींग अपघाता प्रकरणांत ’हायक ऍण्ड फ्लाय’ हे पॅराग्लायडींग कंपनीचे धनी शेखर रायझादा (मूळ उत्तरप्रदेश) हांचे आड मांद्रें पुलिसांनी गुन्यांव नोंद केला. ह्या अपघातांत पुणेची शिवानी दाभाळे (२७) हे पर्यटक तरणाटे सयत पॅराग्लायडींग पायलट सुमन नेपाली (२६) ह्या दोगांकूय मरण आयिल्लें.
तपासा मजगतीं, ’हायक ऍण्ड फ्लाय’ हे पॅराग्लायडींग कंपनीचे धनी शेखर रायझादा (मूळ उत्तरप्रदेश) पर्यटन खातें आनी संबंदीत विभागां कल्यान पॅराग्लायडींग सारकिल्ल्या खेळांचें संचालन करपा खातीरची गरजेची आशिल्ली कसलीच परवानगी, परवाने घेनासतनाच आयोजन करताले अशें कळून आयलें. तशेंच आनीक फायदो मेळपाचे आशेन पॅराग्लायडींगा खातीर गरजेचें आशिल्ल्या सुरक्षा उपायांकडेन पुरायेन आडनदर करन तांणी पर्यटकांचो जीव धोक्यांत घाल्ल्याचेंय उक्ताडार आयलें. हे विशीं मांद्रें पुलीस स्टेशनाचे पुलीस उपनिरीक्षक परेश काळे हांणी योग्य कलमां खाला गुन्यांव नोंद केला.
हे घडणुके विशीं मेळिल्ले म्हायती प्रमाण, पॅराग्लायडींग ऑपरेटर सुमन नेपाळी आनी पर्यटक शिवानी दाभाळे ही दोगांय पॅराग्लायडींग करतना अचकीत पॅराग्लायडिंगची एक दोरी तुटले उपरांत ती वयल्यान सरळ दोंगरार पडिल्ल्यान तांकां मरण आयलें. ही घडणूक सांजेवेळार सुमार ४.३० वरांचेर घडली. त्या दोगांयच्यो कुडी पोस्टमार्टमा खातीर हॉस्पिटलांत धाडल्यात. शिवानी दाभाळे पुणेचे एके खाजगी कंपनींत काम करताली. आपल्या एका इश्टा वांगडा ती गोंयांत पर्यटना खातीर आयिल्ली. हे घडणुके विशीं पुलीस फुडें तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
