भांगरभूंय | प्रतिनिधी
बांगलादेश, दक्षीण आफ्रिका आनी ऑस्ट्रेलिया ह्या पंगडांनी आयसीसी 19 वर्सां पिराये सकयले बायलांचे संवसारीक टी-20 सर्तींत जैत जोडलें. पावसान मॅचींनी आडखळ हाडली. दक्षीण आफ्रिका पंगडान म्हत्वाचे मॅचींत न्युझिलॅण्ड पंगडाक हारोवन आपल्या अभियानाची सुरवात केली. जाल्यार बांगलादेशान उण्या स्कोराचे मॅचींत नेपाळ पंगडाक 5 विकेटींनी हारयलो.
काओइमहे ब्रे हिणें फकत एक धांवडी दिवन तीन विकेटी घेतल्यो, ताका लागून ऑस्ट्रेलिया पंगडान स्कॉटलॅण्ड पंगडाक सहज हारयलो. पावसाक लागून तीन मॅची रद्द करच्यो पडल्यो. इंग्लंड आनी आयर्लेण्ड पंगडा मदले मॅचींत आनीक सात बॉल घालपाक मेळिल्ले जाल्यार निकाल लागपाचो. सर्तींत पदार्पण करपी नायजिरिया आनी समोआ तशेंच अमेरिका आनी पाकिस्तान ह्या पंगडां मदली मॅच पावसाक लागून सुरू जाली ना.
डी गटांत बांगलादेशान नेपाळाचो डाव 18.2 ओव्हरींनी फकत 52 धांवड्यांचेर सोंपयलो आनी उपरांत 13.2 ओव्हरींनी 5 विकेटी व्हगडावन जैत मेळयलें.
डी गटांतले दुसरे मॅचींत ऑस्ट्रेलिया पंगडान स्कॉटलॅण्डाचो डाव 48 धांवड्यांचेर सोंपयलो. उपरांत 6.4 ओव्हरींनी 1 विकेट व्हगडावन मोख मेळयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
