भांगरभूंय | प्रतिनिधी
-महोत्सवांत 10 मिण्टांचें 36 लघुपट आनी संस्कृत भाशेंतल्यान 30 रीलांचो आस्पावपणजीः संस्कृत भारती अंदूं गोंयांत 6वो आंतरराष्ट्रीय संस्कृत लघुपट महोत्सव मनयतली. ह्या महोत्सवांत 10 मिण्टांचें 36 लघुपट आनी संस्कृत भाशेंतल्यान 30 रील आयल्यात. हे लघुपट आनी रील 24 जानेवारीक दाखयतले आनी उत्कृश्ट लघुपट आनी रील हांकां पुरस्कार दितले अशी म्हायती संस्कृत भारतीच्या अधिकाऱ्यांनी दिली.
ही विशीं म्हायती दिवपा खातीर संस्कृत भारतीन पाट्या वयल्या गोंय कामगार पत्रकार संघटनेच्या परिशद सभाघरांत पत्रकार परिशद घडोवन हाडली. पत्रकार परिशदेक संस्कृत भारतीच्या अखील भारती स्त्रोत्र पठण केंद्राचे मुखेली चिन्मय अमशेकर, संस्कृत भारतीचेे अध्यक्ष आनंद देसाय आनी गोंय विभाग मंत्री आत्माराम उमर्ये हाजीर आशिल्ले.
गोंय सरकाराच्या म्हायती आनी प्रसारण खात्यान संयुक्तपणान आयोजीत केल्लो आंतरराष्ट्रीय संस्कृत लघुपट महोत्सव शुक्रारा 24 जानेवारीक गोंय मनरिजवण संस्था सभाघरांत दनपारां 3.30 वरांचेर जातलो अशें पत्रकारां कडेन उलयतना चिन्मय अमशेखर हांणी सांगलें.
राज्याचे मुख्यमंत्री डॉ. प्रमोद सावंत आनी कलम 370 ह्या चित्रपटाचे दिग्दर्शक आदित्य जांभळे हांचे हस्तुकीं इनामां भेटवण सुवाळ्यान ही कार्यावळ सोंपयतली. उज्जैन कालिदास संस्कृत अकादेमीचे संचालक गोविंद गन्धे, सहाय्यक प्राध्यापक आनी कन्नड अभिनेते डॉ. चन्नाबास्वामी हिरेमठ, 1999.
मुंबयचो अभिनेते आनी दिग्दर्शक युवराज कुमार सयत जायते फिल्म दिग्गज ह्या कार्यावळींत वांटो घेतले अशी म्हायती अमशेखर हांणी दिली.
संस्कृत भारती फाटलीं 45 वर्सां संस्कृत मळार वावुरता. संवाद चळवळींतल्यान सुरू जाल्लो संस्कृत भाशेचो प्रचार करपाचो वावर पुराय भारतांत आनी परदेशांत चालू आसा. संस्कृत भारती शास्त्रसंरक्षण, संस्कृत ग्रंथांचो शास्त्रीय अभ्यास, विंगड विंगड संस्कृत ग्रंथांचो प्रकाशन अशा विंगड विंगड मळार आपली खाशेली सुवात मेळयल्या. फाटलीं 5 वर्सां संस्कृतभारती आंतरराष्ट्रीय संस्कृत लघुपट महोत्सव घडोवन हाडटा अशें अशे अमशेखर हांणी सांगलें.
लिटल चॅम्प ऋषिकेश ढवळीकार हाच्या ‘सा रे गा मा पा’ ह्या येवकार गीतान कार्यावळीची सुरवात जातली.
ताचे उपरांत पुरस्कार फावो जाल्ल्या लघुपटांचें प्रदर्शन जातलें. वेगवेगळ्या वर्गांत 35 इनामां दितले. तशेंच गोंयांतल्या शाळांतल्या विद्यार्थ्यांनी तयार केल्ले संस्कृत रील तशेंच संस्कृत लघुपट दाखयतले. शाळा पांवड्या वेले सर्तींत गोंयच्या पांच शाळांनी वांटो घेतला अशें अमशेखर हांणी सांगलें.
आंतरराष्ट्रीय लघुपट महोत्सवांत आपले लघुपट सादर करपी कलाकार वेवसायीक कलाकार न्हय. संस्कृताच्या मोगान ते रील आनी लघुपट तयार करतात आनी धाडटात. फिल्म निर्मितीचें प्रशिक्षण ना. लघुपट भारतांतल्यानच न्हय जाल्यार विदेशांतल्यानूय आयल्यात. गोंयांत जावपी हो सवो लघुपट महोत्सव. हाचे आदीं दोन फावटीं हो लघुपट महोत्सव एक फावट नासिकांत, एक फावट मुंबय, एक फावट नागपूरांत आनी फाटल्या वर्सा चेन्नयंत जाल्लो अशी म्हायती अमशेखर हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
