भांगरभूंय | प्रतिनिधी
श्रीपाद नायकः प्रामाणीक कामाचीं फळां आयज मेळटात
भांगरभूंय । प्रतिनिधी
पणजीः ज्या वेळार गोंयांत आमी भाजपाचें काम सुरू केलें त्या वेळार आमकां खूबशे त्रास सोंसचे पडले. पूण पक्षाक येस मेळत गेलें तशें तेन्नाचे मुख्यमंत्री प्रतापसिंह राणे हांणी आमकां काँग्रेसीचे तिकेटीचेर विधानसभा वेंचणूक लडोवन आमदार जावपाचे आनी ते उपरांत मंत्रीपद दिवपाचे खूबशे प्रस्ताव दिल्ले. पूण ते न्हयकारून आमी पक्षा खातीर प्रामाणीकपणान काम केलें. ताचीं फळां आयज आमकां मेळटात, अशें केंद्रीय मंत्री श्रीपाद नायक हांणी शेनवारा स्पश्ट केलें. भाजपाचे नव्यान वेंचून आयिल्ले प्रदेशाध्यक्ष दामू नायक हांच्या भोवमान सुवाळ्यांत ते उलयताले. गोंयांत भाजपाचीं पाळांमुळां घट करतना कांय खेपे आमकां संघर्श करचो पडलो. काँग्रेस आनी हेर पक्षांच्या फुडाऱ्यां कडल्यान टिका सोंसच्यो पडल्यो. पूण आमी केन्नाच निरशेवंक नात. शांत चित्तान पक्षाचें काम प्रामाणीकपणान करीत रावले. ल्हवू ल्हवू गोंयांत भाजपाक येस मेळत गेलें. त्या वेळार सध्याच्या भाजप सरकारांतले मंत्री सुभाष शिरोडकार काँग्रेसींत आशिल्ले. तांचे वरवीं तेन्नाचे मुख्यमंत्री प्रतापसिंह राणे हांणी आपल्याक काँग्रेसीचे तिकेटीचेर मडकय मतदारसंघांतल्यान विधानसभा वेंचणूक लडोवपाक सांगिल्लें. आमदार जाले उपरांत मंत्रीपद दिवपाचीय ऑफर दिल्ली, पूण आपणे ती ऑफर न्हयकारली. प्रामाणीकपणान पक्षाचें काम करीत रावलों. संघटन ही पक्षाची ताकद आसता, हें लक्षांत घेवन आमी त्या वेळार काम केलें. ताचो फायदो प्रदेश भाजपाक मेळत गेलो, अशेंय नायक हांणी सांगलें.
आमचें राजकारण समाजकारणा खातीर: श्रीपाद नायक
समाजकारणा खातीर राजकारण हें आमचें तत्व आसा. आमी 80 टक्के समाजकारण आनी 20 टक्के राजकारण करीत आयल्यात. भाजपाचो दरेक कार्यकर्तो आयज लेगीत सुवार्था विणें काम करता. तेच खातीर कार्यकर्त्यांक पक्षांत व्हड व्हड संदी मेळटात. दामू नायक हे तांचे मदले एक कार्यकर्ते आसात. ते खातीर आयज तांची प्रदेशाध्यक्षपदार निवड जाली, अशें श्रीपाद नायक हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
