भांगरभूंय | प्रतिनिधी
पेडणें: केरी दर्यादेगे वयल्या दोंगरा वयल्यान पॅराग्लायडींग करतना पुणेची शिवानी दाभळे (26) आनी त्या पॅराग्लायडींगचो पायलट सुमन नेपाळी (25) ह्या दोगांक मरण आयलें.
मेळिल्ले म्हायती प्रमाण पुणेचे कांय पर्यटक पॅराग्लायडींग करचे खातीर केरी दोंगरा वयल्या वेवसायिका कडेन गेले. ताणें आपलो पायलट सुमन नेपाळी हाका शिवानी दाभळे हिच्या पॅराग्लायडींगाचो पायलट म्हूण धाडलो. दोगूय पॅराग्लायडींग करतना शिवानीच्या हातांत आशिल्ली दोरी अचकीत तुटली. दोरी तुट्टाच पॅराग्लायडींगांत हवा भरली आनी थेट दोंगराचेर पडून दोगांकूय मरण आयलें. ही दुर्घटणा शेनवारा सांजेच्या 4.30 वरांच्या सुमाराक घडली. तशें तरेचो गुन्यांव मांद्रें पुलीस स्टेशनाचेर नोंद केला. मांद्रें पुलिसांनी घडणुकेचो पंचनामो करून दोनूय कुडी बांबोळी हॉस्पिटलांत पोस्टमार्टमा खातीर धाडल्यात.
मजगतीं, केरी पंचायतीन फाटल्या कांय म्हयन्यां आदीं केरी दर्यादेगेर कसलेच तरेचे पॅराग्लायडींग करपाक मनाय करपी थाराव सगळ्यांच्या मतान मंजूर केल्लो. तो थाराव संबंदीत खात्याक धाडिल्लो. अशें आसून लेगीत तो थाराव कोयराच्या बल्लांत उडयिल्ल्यान थळाव्या लोकां मदीं तिडक पातळ्ळ्या.
पॅराग्लायडींगाक विरोध करून तसो थाराव मंजूर करून लेगीत सरकारान पॅराग्लायडींग वेवसायिकांक परवाने कशे दिले, हाची सविस्तर म्हायती सरकारान जाहीर करची, अशें थळाव्या कांय लोकांनी प्रतिक्रिया दितना सांगलें. पॅराग्लायडींग शेखर नांवाचे मनशाचे मालकीचो आशिल्लो, अशी म्हायती मेळ्ळ्या. हरमल, केरी दर्यादेग वाठारांत कांय बेकायदेशीर पॅराग्लायडींग पॅराशूट वेवसाय करतात, अशीय म्हायती मेळ्ळ्या.
बेकायदो पॅराग्लायडींग आडावप गरजेचें: आरोलकार
दर्यादेग वाठारांत पॅराग्लायडींग करपा खातीर आपलो आदींच्यानूच विरोध आशिल्लो. आपणे पर्यटन खात्याक, पर्यटन मंत्र्यांक तशें कळयल्लें. तेचवरी केरी पंचायतीक लेगीत आपणें सुचोवणी केल्ली. ते प्रमाण केरी पंचायतीन ग्रामसभेंत थाराव घेवन तो मंजूर केल्लो. आपणे दर्यादेग पुलिसांक लेगीत सुचोवण्यो केल्ल्यो. जे कोण बेकायदो वेवसाय करतात, तांचेर कारवाय करची. जर ती केल्ली जाल्यार आयची ही घडणूक घडची नाशिल्ली. अशी दुर्घटणा परतून घडची न्हय हे खातीर बेकायदो पॅराग्लायडींक आडावप गरजेचें आसा, अशें मत आमदार जीत आरोलकार हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
