भांगरभूंय | प्रतिनिधी
दिवचलः आमोणा पुला लागसार जाल्ल्या ‘हिट ॲण्ड रन’ अपघातांत रस्त्या कुशीक कुल्ल्यो विकूंक बशिल्लो गंभीर जखमी जाल्लो शांबा तारी (79, माशेल) हाका जीएमसींत उपचारा वेळार मरण आयलें. ह्या अपघाताक जापसालदार आशिल्लो पळून गेल्लो नवीन गावडे (पाडेली, भिरोंडा-सत्तरी) हाका दिवचल पुलिसांनी अटक केली. तशेंच निळ्या रंगाची जीए 03 सी 1535 ही व्हेगन आर कार जप्त केली.
ही घडणूक काल शुक्रारा ता. 17 सांजवेळार सुमार 5.30 वरांचेर घडली. आमोणा पुला लागसार रस्त्या कुशीक कुल्ल्यो विकूंक बशिल्लो शांबा तारी हाका निळ्या रंगाच्या गाडयेन धपको दिवन पळ काडलो. हांतूत शांबा तारी गंभीर जखमी जालो. उपरांत रोखडोच ताका उपचारा खातीर जीएमसींत व्हेलो. पूण काल रातीं उपचारा वेळारुच ताका मरण आयलें.
ह्या अपघाताक निळी गाडी जापसालदार आसा हें पुलिसांक कळ्ळे उपरांत तांणी गाडयेचो सोद घेवपाक सुरू केले. पुलिसांक सीसीटीव्ही कॅमेऱ्याचेर गाडयेचे फुटेज मेळ्ळे बरोबर गाडयेची नोंदणी आनी गाडयेच्या धनयाचो सोद घेतलो. हाचे उपरांत तपास करुन पुलिसांनी नवीन गावडे हाका अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
