भांगरभूंय | प्रतिनिधी
बिनविरोध निवड; आयज जातली घोशणा
भांगरभूंय । प्रतिनिधी
पणजीः भाजप प्रदेशाध्यक्षपदा खातीरचे वेंचणुकेंत आदले आमदार दामू नायक हांचो एकल्याचोच अर्ज आयिल्ल्यान तांची बिनविरोध निवड जाली. मुख्यमंत्री डॉ. प्रमोद सावंत, भाजपचे राष्ट्रीय सरचिटणीस सुनील बन्सल आनी केंद्रीय मंत्री श्रीपाद नायक हांचे हाजिरेंत शेनवारा सकाळीं दामू नायक हांच्या नांवाची घोशणा जातली.
मंडळ, जिल्हो अध्यक्षपदांच्यो नेमणुको जाले उपरांत भाजप प्रदेशाध्यक्षपदाची प्रक्रिया फाटल्या कांय दिसां सावन चालू आशिल्ली. ह्या पदाचे सर्तींत दामू नायक हांचे सयत आदले खासदार अॅड. नरेंद्र सावयकार, आदले मंत्री दयानंद मांद्रेंकार, दिलीप परुळेकार, बाबू कवळेंकार, आदले आमदार दयानंद सोपटे आनी वरिश्ठ फुडारी दत्ता खोलकार हे सात फुडारी आशिल्ले. तातूंत दामू नायक हांणी सगळ्यांक फाटी घातले.
भाजपांतल्यो संघटनात्मक वेंचणुको सदांच बिनविरोध जातात. ते खातीर मंडळ, जिल्हो अध्यक्षांचे निवडी उपरांत प्रदेशाध्यक्षपदाची वेंचणूक लेगीत बिनविरोध जाली.
मजगतीं, अस्तमते प्रदेशाध्यक्ष सदानंद शेट तानावडे हांचो कार्यकाळ पोरूंच सोंपिल्लो. पूण लोकसभा आनी हेर राज्यांतल्या विधानसभा वेंचणुकांक लागून देशभरांतल्या हेर राज्यां वरीच भाजपच्यो गोंयांतल्यो संघटनात्मक वेंचणुको लेगीत फुडें धुकल्ल्यो. ताका लागून तानावडे हांकां प्रदेशाध्यक्ष म्हूण मुजतवाड दिल्ली. हे मजगतीं, तानावडे हांची पक्षान राज्यसभा खासदार म्हूण नेमणूक केली. ते उपरांत खासदार आनी प्रदेशाध्यक्ष ह्या दोनूय पदांचो भार ते सांबाळटाले.
दामू हांचें वजन वाडोवपीं कारणां
भाजपचे केडर आनी निश्ठावंत कार्यकर्ते म्हूण सगळ्यांक वळखीचे. पक्षाचे तळागाळांतले पदाधिकारी आनी कार्यकर्त्यां कडेन लागींचे संबंद. राष्ट्रीय स्वंयसेवक संघ आनी केंद्रांतल्या भाजपाच्या वरिश्ठ फुडाऱ्यां कडेन बरे संबंद. गोंयांत भंडारी समाजाची लोकसंख्या सगळ्यांत चड आसा. ताका लागून दरेके वेंचणुकेंत भंडारी समाजाचीं नतां निर्णायक थारतात. दामू नायक भंडारी समाजांतल्यान येतात.
दामू नायक हांचो राजकी प्रवास
नवे कार्यकर्ते जोडून संघटण वाडयतलों: दामू
संवसारांत सगळ्यांत व्हड पक्ष आशिल्ल्या भाजपाचो प्रदेशाध्यक्ष जावप हो आपले खातीर खोशयेचो खीण आसा. भाजपाच्या आदल्या आनी नव्या कार्यकर्त्यांच्या नेटार गोंयांत पक्ष व्हड जालो. हे आदींच्या सगळ्याच प्रदेशाध्यक्षांनी पक्षाक घटसाण मेळोवन दिली. तेच पद्दतीन येता त्या काळांत नवे कार्यकर्ते जोडून पक्षाचें संघटण वाडोवपाचेर आनी येता त्यो सगळ्यो वेंचणुको जिखपाचेर आपलो भर आसतलो, अशी प्रतिक्रिया दामू नायक हांणी दिली.
अस्तमते अध्यक्ष सदानंद शेट तानावडे हांणी प्रदेशाध्यक्ष म्हूण दर्जेदार कामगिरी केली. पक्षाच्या नेमा प्रमाण आतां दामू नायक हांच्या रुपान नव्या मुखामळाक प्रदेशाध्यक्ष म्हूण संद दिल्या. पक्ष संघटण वाडोवचे खातीर दामू नायक निश्चीत बरो वावर करतले, हाचो आपल्याक विस्वास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
