भांगरभूंय | प्रतिनिधी
50 ते 90 टक्के मेरेन मेळटा अनुदानः शेतकी संचालनालयाची म्हायती
भांगरभूंय । समीप नार्वेकार
पणजीः राज्यांत शेतांत तंत्रगिन्यानाची जोड दिवपा खातीर राज्य सरकारान माक्नांचेर अनुदान दिवपाची येवजण जाहीर केल्या. फाटलीं पाच वर्सां हे येवजणे खाला सुमार 12 हजार शेतकारांनी सराकारी अनुदानाचेर माक्ना घेतल्यांत. सुमार 18 कोटी इतले अनुदान सरकारान दिलां, अशी म्हायती शेतकी संचालनालयान दिल्या.
शेतकी संचालनालयातल्या वरिश्ठ अधिकाऱ्यान दिल्ले म्हायती प्रमाण, शेतकी मळार तंत्रगिन्यानांक प्रोत्साहन दिवपाचे येवजणे खाला राज्यांचे शेतकारांक वीड कटर, पावर टीलर, ट्रॅक्टर, हार्वेस्टर विकत घेवपाक अनुदान मेळटा. दर माक्नां फाटल्यांन कमीत कमी 50 टक्के जाल्यार चडांत चड 90 टक्के अनुदान मेळटा. एसटी समुदाया खातीर आनी वीड कटरां खातीर 90 टक्के अनुदान मेळटा. हे खातीर फक्त माक्ना खातीर 10 टक्के पयशो मोडपाक जाय. उरिल्ले सरकार दितले. जाल्यार हेर सामान्य वर्गा खातीर 50 टक्के अनुदान आसा. हे खातीर शेतकार अर्दे आपले पयशे आनी अर्दे पयशे राज्य सरकार दितलें.
फाटलीं पांच वर्सांत गोंयच्या 12,368 शेतकारांनी हे येवजणेतले अनुदान घेवन 12,212 इतली माक्ना घेतल्यात. हे खातीर सरकारान 18.27 कोटी इतलें अनुदान दिलां.
वर्स 2019- 20 त 2248 शेतकारांनी 2248 माक्नां विकतीं घेतलीं आनी हे खातीर राज्य सरकारान 4.79 कोटी अनुदान दिलें. वर्स 2020-21 त 1470 शेतकारांनी 1470 माक्नां विकतीं घेतलीं आनी हे खातीर राज्य सरकारान 4.22 कोटी अनुदान दिलें. वर्स 2021-22 त 3038 शेतकारांनी 3035 माक्नां विकती घेतली आनी हे खातीर राज्य सरकारान 4.63 कोटी अनुदान दिलें. वर्स 2022- 23 त 2886 शेतकारांनी 2886 इतलीं माक्नां विकतीं घेतलीं आनी हे खातीर राज्य सरकारान 2.81 कोटी अनुदान दिलें. वर्स 2023- 24 त 2145 शेतकारांनी 2145 माक्नां विकतीं घेतलीं आनी हे खातीर राज्य सरकारान 1.31 कोटी अनुदान दिलें. वर्स 2024- 25 त नोव्हेंबर 2024 मेरेन 425 शेतकारांनी 584 माक्नां विकतीं घेतलीं आनी हे खातीर राज्य सरकारान 51 लाख अनुदान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
