भांगरभूंय | प्रतिनिधी
फोंडें, प्रतिनिधी ः खांडेपार ते फर्मागुडी मेरेनच्या रस्त्याच्या रुंदीकरणाचे काम सध्या नोटान सुरू आसा. वाहन चालकांक सुचोवण्यो दिवपा खातीर वेगवेगळ्यां सुवातींनी बोर्ड लायल्यात. पूण केरये – खांडेपारा रस्त्याच्या मदीं कंटेनर आनी हेर जड वाहनां यू-टर्न मारतात ताका लागून अपघातांचो धोको वाडला. देखून वाहन चालकांनी वाठारांत यू-टर्न घेवपी वाहनांचेर निर्बंध घालपाची मागणी केल्या.
कांय दिसां आदीं ह्याच सुवातेर रस्त्यार काम करपी बायलेक मोटारसायकलीन धपको दिल्लो. अपघातांत जखमी जाल्ले बायलेचेर जीएमसींत उपचार चलताले. तशेंच फाटल्या बिरेस्तारा खुरसाकडे – उसगांवा रस्तो दुरुस्तीचें काम चालू आसतना दुचाकी गाडयेन धपको दिल्ल्यान एक कामगार जखमी जाल्लो. अशें अपघात फुडाराक घडचें न्हय म्हूण रस्त्याच्या मदीं यू-टर्न घेवपी वाहनांचेर निर्बंध घालपाची मागणी लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
