भांगरभूंय | प्रतिनिधी
कोडिंग, रोबोटिक्स शिक्षणांत गोंय बेंगळुरू आनी पुणे शारां परस फुडें
पणजीः राज्यांतल्या 442 विद्यालयांतल्या 65 हजार विद्यार्थ्यांनी आतां मेरेन कोडिंग आनी रोबोटिक्साचे शिक्षण घेतलां. 2024-25 वर्सांत कोडिंग आनी रोबोटिक्स शिकपी 10,000 विद्यार्थी आसात. कोडिंग आनी रोबोटिक्स शिक्षणांत गोंय बेंगळुरू आनी पुणे सारकिल्ल्या व्हड शारां परस फुडें आसा. तंत्रीक शिक्षणांतय गोंय स्वयंपूर्णतेचे दिकेन वता अशें मुख्यमंत्री डॉ. प्रमोद सावंत हांणी म्हणलें.
केरस येवजणे खाला आशिल्ल्या उपकरणां आनी सुविधांचें उक्तावण मुख्यमंत्री डॉ. प्रमोद सावंत हांचें हस्तुकीं जालें. ह्या वेळार शिक्षण सचीव प्रसाद लोलयेकार, तंत्रीक शिक्षण संचालक विवेक कामत, शिक्षण संचालक शैलेश झिंगडे आनी हेर मानेस्त हाजीर आशिल्ले.
कोडिंग आनी रोबोटिक्स सारकेच उच्च शिक्षणांतूय नोकरींच्या संदीक पूरक अशें तंत्रीक अभ्यासक्रम तयार करपाची गरज आसा. चडांत चड विद्यार्थी कोडिंग आनी रोबोटिक्साचे शिक्षण घेतात. हाका लागून फुडल्या दोन वर्सांत अभियांत्रिकी म्हाविद्यालयांतली एकूय सुवात रिती उरची ना अशी आस्त मुख्यमंत्र्यांनी उक्तायल्या.
केरस येवजणे खाला कोडिंग, रोबोटिक्स हँडबूक, हार्डवेअर किटांचे उक्तावण केलें. ह्या वेळार आयोजीत केल्ल्या प्रदर्शनाचीय मुख्यमंत्र्यांनी पळोवणी केली. केरस क्रिएटिव्ह कंटेंट क्रिएटर पुरस्कार अमोल नायक (मुरगांव हायस्कुल, सडा) आनी आदित्य नायक (शांतदुर्गा हायस्कुल, दिवचल) हांकां फावो जालो.
बेब्रास इंडिया चॅलेंज सर्तींत गोंयच्या विद्यार्थ्यांनी पयले चार क्रमांक मेळयले. तशेंच गोंयच्या 22 विद्यार्थ्यांनी पयल्या 100 विद्यार्थ्यां मदीं सुवात मेळयली. प्रधानमंत्री नरेंद्र मोदी हांची आत्मनिर्भर भारताची संकल्पना साकार करपाचे दिकेन गोंयची वाटचाल सुरु आसा. कोडिंग आनी रोबोटिक्स अभ्यासक्रम हो हाचोच एक भाग. दूद, भाजी, नुस्तें ह्या सारक्या गरजेच्या वस्तूंनीच न्हय तर तंत्रीक शिक्षणांतूय गोंय स्वयंपूर्ण जावंक जाय अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
