देवनागरी सोडून हेर लिपींक सोंपोवपाचो कोंकणी परिशदेचो हेत

भांगरभूंय | प्रतिनिधी

केनेडी आफोंसोचो आरोप: आमी पांचूय लिपींक एकठांय हाडूंक सोदतात

मडगांव, प्रतिनिधी ः कोंकणी भाशकां मदीं देवनागरी कोंकणी वापरप्यांचो आंकडो 12 टक्के आसा. हेर सगळीं रोमी, कन्नड, मलयाळम आनी पर्सो- अरेबिक लिपीचे आसात. देवनागरी कोंकणी वापरपी उणे आसून लेगीत तांणी कोंकणी परिशद घडोवन हाडली. हे परिशदेचो हेत म्हणल्यार हेर कोंकणी लिपयो ना करप, असो गंभीर आरोप ग्लोबल रोमी लिपी अभियानचे अध्यक्ष कॅनेडी अफान्सो हांणी केला.
मडगांवांत पत्रकार परिशद घेवन अफान्सो हांणी सांगलें : सगळ्यो कोंकणी संस्था आनी कोंकणी खातीर वावुरप्यांक एकठांय हाडपा खातीर ग्लोबल रोमी लिपी अभियान ही नवी संस्था स्थापन केली. देवनागरी सोडून हेर लिपी वापरपी लोक व्हड प्रमाणांत आसले तरी तांचे मदीं एकवट ना. देखून पांचूय कोंकणी लिपींक एकठांय हाडपाचो वावर सुरू आसा. हे खातीर मंगळुरांतूय बसका जाल्यो. त्या वेळार सगळ्यो लिपी आस्पावीत आशिल्ली एक महासभा घडोवन हाडली.
पूण, महासभा आयोजीत करतना ग्लोबल कोंकणी फोरमाच्या कांय वांगड्यांनी कांय संघटनांच्या आमंत्रणाक विरोध केलो आनी आपसांत मतभेद निर्माण जाले. देखून नवी संस्था स्थापन केली. फकत देवनागरी कोंकणी भास फुडें केल्ल्यान कोंकणी भास वापरपी दुसरे भाशे कडेन वळपाक लागल्यात. हाका लागून संवसारभरांतले सगळे कोंकणी उलोवपी एकठांय येतले आनी हे संस्थे वरवीं रोमी कोंकणी चळवळ मुखार व्हरतले, अशेंय तांणी सांगलें.