भांगरभूंय | प्रतिनिधी
पसंतीच्या अभ्यासक्रमाची निवड करपाची विद्यार्थ्यांक मेळटली संद
भांगरभूंय । प्रतिनिधी
पणजी : राष्ट्रीय शिक्षण धोरणा खाला गोंयांत दोन क्लस्टर विद्यापिठां स्थापन करपाचें निश्चीत जालां. क्लस्टर विद्यापीठ जाले उपरांत म्हाविद्यालयीन अभ्यासक्रम गोंयचे गरजे प्रमाण क्लस्टर विद्यापीठ तयार करतलें. तशेंच विद्यार्थ्यांक पसंतीच्या अभ्यासक्रमाची निवड करप शक्य जातलें. क्लस्टर विद्यापिठांतल्यान विद्यार्थ्यांक नोकरेच्यो संदी तयार जातल्यो. तशेंच दर्जेदार शिक्षण घेवप शक्य जातलें.
गोंयांत राष्ट्रीय शिक्षण धोरणाची कार्यवाय सुरू जाल्या. फुडल्या वर्सा धावी, सवी आनी तिसरेक एनईपीची कार्यवाय जातली. म्हाविद्यालयीन आनी वेवसायीक शिक्षण पावंड्यार लेगीत राष्ट्रीय शिक्षण धोरणाची कार्यवाय सुरू जाल्या. उत्तर गोंयांत एक आनी दक्षीण गोंयांत एक अशीं दोन क्लस्टर विद्यापिठां गोंयांत स्थापन जातलीं, अशी म्हायती मुख्यमंत्री डॉ. प्रमोद सावंत हांणी दिल्या. क्लस्टर विद्यापीठ ही संकल्पना गोंयच्या विद्यार्थ्यां खातीर वरदान थारतली, अशें तांणी म्हणलां.
क्लस्टर विद्यापिठाचें म्हाविद्यालय तशेंच विद्यार्थ्यांक हे लाव जातले :
– लागसारचीं म्हाविद्यालयां एकठांय येतलीं. हाका लागून वाचपघर, प्रयोगशाळा आनी हेर सुविधांचो सगळ्या विद्यार्थ्यांक लाव जातलो. पात्रताय आशिल्ल्या शिक्षक वर्गाचें मार्गदर्शन मेळटलें
– कला, वाणिज्य म्हाविद्यालयां सयत वेवसायीक म्हाविद्यालयां एकठांय आयले उपरांत तरेकवार अभ्यासक्रम विद्यार्थ्यांक उपलब्ध जातले. वेगळ्या शिक्षक वर्गाची नेमणूक करची पडची ना.
– शिक्षणीक सुविधा आनी स्पेशलायजेशना खातीर वेगळो कर्मचारी वर्ग आनी मुळाव्यो सुविधा तयार करपाची गरज पडची ना.
– क्लस्टर विद्यापीठ गरजे प्रमाण प्रात्यक्षिकाचेर आदारीत कुशळटाय विकसीत करपी अभ्यासक्रम तयार करपाक शकता.
– परंपरीक विद्यापीठ आनी म्हाविद्यालयांची संलग्नता ही पद्दत ल्हवू ल्हवू बंद पडटली.
– समान हॉस्टेल सुविधा तयार जातली. वेगवेगळी हॉस्टेल सुविधा तयार करची पडची ना.
– क्लस्टर विद्यापिठाक लागून कॅम्पस प्लेसमेंटांत म्हाविद्यालयीन विद्यार्थ्यांक वांटेकार जावंक मेळटले. म्हाविद्यालयांनी व्हड कंपनीं येनात. क्लस्टर विद्यापीठ जाले उपरांत भोवराष्ट्रीय कंपनीं कॅम्पस मुलाखतीक येतल्यो.
– परंपरीक विद्यापिठा परस क्लस्टर विद्यापिठांत म्हाविद्यालयांक शिक्षणीक उपक्रमांत वांटो घेवपाची चड संद उपलब्ध जातली.
– म्हाविद्यालयां मदीं शिक्षणीक देवाणघेवाण जावपाचें प्रमाण वाडटलें.
– लागसारच्या म्हाविद्यालयांत अभ्यासक्रम पुराय करप विद्यार्थ्यांक शक्य जातलें.
– म्हाविद्यालयांक रँकींग, ग्रेडींग सुदारपाची संद मेळटली.
– विद्यार्थ्यांचे गुणवत्तेची तपासणी वा मुल्यांकन भायली संस्था करची ना. विद्यार्थी शिकता तें म्हाविद्यालयूच करतलें.
– नवे शिक्षणीक फांटे तयार करपा सयत अभ्यासक्रम तयार करपाची जापसालदारकी म्हाविद्यालयांचेर आसतली. – क्लस्टर विद्यापीठ ही शिक्षणीक आनी प्रशासकी जापसालदारी एकठांय आसपी वेवस्था आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
