भांगरभूंय | प्रतिनिधी
-पशुपालन खात्याचे संचालक व्ही. पी. सिंग हांचो उलो फोंडेंः पशुपालन खातें देशभरांत जनावरांचें सर्वेक्षण करता. ऑक्टोबरांत सुरू जाल्लें हें सर्वेक्षण फेब्रुवारी मेरेन चालू आसतलें. गोंयकारांनी आपल्या पोशिल्ल्या प्राण्यां विशीं पुराय म्हायती अधिकाऱ्यांक दिवची, अशें आवाहन पशुपालन खात्याचे संचालक व्ही. पी. सिंग हांणी पत्रकार परिशदेंत केलां.
हे पत्रकार परिशदेक डॉ. माणीक पाटील आनी हेर अधिकारी हाजीर आशिल्ले.
गोंयांत गाय, बैल, घरगुती सुणी, माजर, बोकडी आनी हेर घरगुती जनावरांचें सर्वेक्षण चालू आसा. हे खातीर राज्यांत 31 सुपरवायझरांची नेमणूक केल्या. 667 गांवांतल्या 266 गांवांतलें सर्वेक्षण पुराय जावपाक लागलां. सर्वेक्षण करपा खातीर गांवांत भोंवपी अधिकाऱ्याक लोकांनी सहकार्य करपाची गरज आसा आनी जनावरांची पुराय म्हायती दिवपाची गरज आसा अशें संचालक व्ही. पी. सिंग हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
