भांगरभूंय | प्रतिनिधी
पणजीः एच.आय.व्ही/एड्स विशीं जागृताय निर्माण करपा खातीर राष्ट्रीय एड्स नियंत्रण संघटणा आनी गोंय एड्स नियंत्रण संघटणेन राष्ट्रीय रेड रन 2.0 आयोजीत केला. ही कार्यावळ 18 जानेवारी शेनवारा सकाळीं 6:30 वरांचेर मिरामार जातली अशी म्हायती गोंय एड्स नियंत्रण संघटनेचे प्रकल्प अधिकारी डॉ. ललिता हुम्रस्कार हांणी दिल्या. बिरेस्तारा पणजे घेतिल्ले पत्रकार परिशदेंत ती उलयताली. ह्या वेळार उमाकांत सावंत हे लेगीत हाजीर आशिल्ले.
सगल्या राज्यांनी जावपी 10 किमी. सर्तींतल्यान पयले दोन जैतिवंत धांवपटू वांटेकार जातले. ही सर्त बायलां, दादले आनी तिसरे जातीच्या तीन विभागांनी जातली. दरेका विभागांतल्या तीन जैतिंतांक 50 हजार रुपया आनी 25 हजार रुपया इनामां दितले. ही सर्त मिरामार सर्कल एनआयओ ओयटी ते मिरामार सर्कल मार्गाचेर जातली.
हाचे भायर सामान्य लोकां खातीर, दिव्यांग आशिल्ल्या व्यक्तीं खातीर, पुलीस, सरकारी अधिकाऱ्यां खातीर खाशेली 2 किमी सर्त घडोवन हाडल्या. सर्त पुराय करपी लोकांक प्रशस्तीप्रमाणपत्र आनी मेडल दितले. हे कार्यावळीक मुख्यमंत्री डॉ. प्रमोद सावंत, भलायकी मंत्री विश्वजीत राणे, केंद्रीय मंत्री श्रीपाद नायक, खासदार सदानंद शेट तानावडे, केंद्रीय सचीव व्ही हेकाली झिमोमी, निखील गजराज, आदी हाजीर आसतले.
मुखेल 10 किमी सर्त सोंपले उपरांत 15 मिनटां उपरांत 2 किमी सर्त सुरू जातली अशें उमाकांत सावंत हांणी सांगलें. हे सर्तींत गोंयच्या हजारां परस चड धांवपटूंन वांटो घेतला. 10 किमी राष्ट्रीय सर्तींत 190 धांवपटूंनी वांटेकार जातले. पुरस्कार सुवाळो सकाळीं 8 वरांचेर मिरमार जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
