भांगरभूंय | प्रतिनिधी
नवी दिल्ली, खबरां संस्था ः प्रधानमंत्री नरेंद्र मोदी हांच्या अध्यक्षते खाला जाल्ले केंद्रीय मंत्रीमंडळ बसकेंत आठव्या वेतन आयोगाची थापणूक करपाक मान्यताय दिल्या. मजगतीं, आठव्या वेतन आयोगाक लागून 1.2 कोटी परस चड केंद्रीय कर्मचाऱ्यांचो आनी निवृत्ती वेतन धारकांचो पगार आनी पेन्शनांत सुदारणा जातली.
हे संबंदी म्हायती दितना केंद्रीय मंत्री अश्विनी वैष्णव हांणी आठव्या वेतन आयोगाच्यो शिफारशी फुडल्या वर्सा सादर करतले अशें स्पश्ट केलां. सातव्या वेतन आयोगाची मुजत 31 डिसेंबर 2025 दिसा सोंपता ताका लागून केंद्रीय सरकाराचे कर्मचारी हे संबंदी घोशणा जावपाची आतुरतायेन वाट पळयताले.
नव्या पगार आयोगाची थापणूक करपा संबंदी फाटल्या वर्सां कर्मचारी प्रतिनिधी आनी वेगवेगळ्यां कामगार संघटनांनी सरकारा कडेन जायत्यो बसका घेतिल्ल्यो. अर्थसंकल्पा पयलीं जाल्ले बसकेचो एक भाग म्हूण हालींच संघटणांनी अर्थमंत्री निर्मला सीतारामन हांकां मेळून सुमार 50 लाख केंद्रीय सरकाराच्या कर्मचाऱ्यां खातीर आनी 67 लाख पेन्शन धरकांक आठव्या वेतन आयोगाची स्थापन करपाची मागणी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
