भांगरभूंय | प्रतिनिधी
मुंबय, खबरां संस्था ः अदानी कंपनीच्या कथित गैरप्रकारा विशीं गौप्यस्फोट करपी हिंडेनबर्ग रिसर्च कंपनी बंद करपाची घोशणा केल्या. संस्थापक नॅथन अँडरसन हांणी ब्लॉग पोस्टांत वेगवेगळीं कारणां दिवन कंपनी बंद करपाची घोशणा केली. ही म्हायती तांणी एक्स ह्या सोशल मिडियाचेर दिल्या. ताणें एक्साचेर पोस्ट बरोवन आनी कंपनी बंद करपाचो निर्णय जाहीर केलो. तशेंच आमी कंपनी बंद करपाचो निर्णय घेतात, आनी आमी थारायिल्लें सगळें पुराय जाल्ल्यान आतां कंपनी बंद करतात अशें तांणी सांगलां.
नॉथन अँडरसन हांणी कितें म्हणलें?
नॅथन अँडरसन हांणी केल्ल्या पोस्टांत ताणें म्हणलें, फुडें असो पर्याय निवडचो पडटलो हें म्हाका सुरवेक खबर नाशिल्ले. हिंडेनबर्ग रिसर्च कंपनी बंद करप हो सोंपो निर्णय नाशिल्लो. कंपनी सुरू करतना हांवें स्वताक विचारलें, “हांव ही कंपनी चलोवपाक सक्षम आसा?” कारण ह्या प्रकारची संशोधन कंपनी चलोवपाचो म्हाका कसलोच पारंपारीक अणभव नाशिल्लो. अशा मळार म्हजे सोयरे वा इश्ट लेगीत नाशिल्ले. हांव सरकारी शाळेंत शिकलो. हें विशीं म्हाका कसलीच म्हायती नाशिल्ली अशें म्हणत तांणी आपलीं भावनां उक्तायलीं.
अदानी कंपनी आड कितें आरोप केल्ले?
हिंडेनबर्ग रिसर्च हे कंपनीन 2023 वर्सा आपल्या अहवालांत अदानी कंपनीच्या आड गंभीर आरोप केल्ले. कॉर्पोरेट जगांत सगळ्यांत व्हड भ्रश्टाचार अदानी कंपनीन केल्याचे ह्या अहवालांत म्हणिल्ले. त्या काळांत गौतम अदानी हो संवसारांतलो चवथो गिरेस्त मनीस आशिल्लो. ह्या अहवालाक लागून भारतांत खूब बोवाळ निर्माण जाल्लो. ह्या अहवालाचो संसदेंत परिणाम जाल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
