भांगरभूंय | प्रतिनिधी
हस्तकला म्हामंडळाचे अध्यक्ष प्रवीण आर्लेकार हस्तुकी धनादेशाचे वांटप
पणजी, प्रतिनिधी : गोंयचे चिकण मातये पसून गणपतीची मुर्त तयार करपी सुमार 300 कारागीरांक 1 कोटी मेरेनचे अनुदान फावो जाला. गोंय हस्तकला म्हामंडळाचे अध्यक्ष प्रवीण आर्लेकार हांचे हस्तुकीं कांय जाणांक हे अनुदानाचे धनादेश भेटयलें. फाटली बरीच वर्सां हे अनुदान पडून उरताले हांवेन म्हामंडळाचो ताबो घेतले उपरांत वेळा भितर हे अनुदान कारागीरांक मेळटा, अशें आर्लेकार हांणी सांगलें. पणजे मातये पसून गणपीतीची मुर्त करपी कलाकारांक अनुदान भेटोवपाची कार्यावळ महामंडळाच्या कार्यालयात जाली. ह्या वेळार प्रवीण आर्लेकार आनी म्हामंडळाचे वेवस्थापकी संचालक अजय गावडे हजर आशिल्लें.
गोंयांत कारागिरांचो आंकडो दुपेटीन वाडचो हे खातीर सरकार यत्न करता. सगळ्यांक सरकारी नोकरी दिवप शक्य ना. देखून आपले कलेचो वापर करून स्वतःची येणावळ तयार करची. जे गोंयात आमचे कारागीर आसात तांचे जीवीत राखपा खातीर आमी यत्न करतात, अशें आर्लेकार हांणी ह्या वेळार उलयतना सांगलें.
बरोच तेप जालो तांका कसली मजत नासली आनी तांची कला विकपा खातीर तांकां कसलोच तेंको नाशिल्लो. गोंयच्या कलाकारा खातीर आमी दोन दालना तयार करतात तांचेनी स्वतःची कलाकृती कसले शुल्क भर नासताना थंयसर हाडून विकची. सगळ्या कलकारांनी म्हामंडळाक संपर्क करचो आनी आमी तांका स्वतःच्या पायार उबे रावपाक मजत दितले. इतली वर्सां जाली सरकार तांची कलाकृती विकती घे नाशिल्ले पूण आमी आता ती विकती घेवन तेच वेळार पयशे दिवपाक तयार आसात, अशीं म्हायती आर्लेकार हांणी दिली,
गणपतीची मुर्त करपी कलाकारांक पयली केन्नाच वेळा भितर अनुदान मेळ नाशिल्ले. फु़डली चवथ येता म्हणसर तांचे पयशे आडखून उरताले. आमी आतां 12 तालुक्यांनी सुमार 1 कोटींचें अनुदान दिलां. थोड्यांचे अनुदान थेट बँकेत जमा जालां जाल्यार काय जाणांक धनादेश दिला. सुमार 300 कलाकारांनी हाचो लाव घेतला, अशें अजय गावडे हांणी सांगलें.
फाटीं कलाकारांची बसका घेवन तांचे विशय म्हामंडळाच्या अध्यक्षान मुख्यमंत्र्यांन कडेन मांडिल्ले. पयली गोंयच्या करागीरांक मार्केट नाशिल्ले. ते आपली कलाकृती दालनात हाडून दवरताले आनी कोणी ती विकती घेतले उपरांतच तांका पयशे मेळटाले अशें ते आस्त धरून बसताले. आतां जो कारागीर वस्तु दालनांत हाडटा तांकां तेन्नाच पयशे मेळटले आनी उपरांत ते आमी विकपाक दवरतले, अशी म्हायती गावडे हांणी दिली.
पणजे बस स्टेंडाचेर महामंडळाचे बऱ्यातले बरें दालन आसा ते आमी रिते केलां आनी दुरूस्त करून ते पुराय कारागीरांक दितले. तांका एकूय रुपया दिवपाची गरज ना. तशेंच अपरान्त मांडाचेर चर्चा चल्ला पूण म्हापशें वा पेडणें करचो हे अजून थारांवक ना. कांय जाण शेजारच्या राज्यांतल्यांन कलाकृती हाडटात हे खातीर तांकां स्वतः कलाकृती करून दाखोवची पडटली, अशें गावडे हांणी सांगले.
चिकण मातयेच्योच मुर्ती घेयातः आर्लेकार
पर्यावरणाचो सांबाळ करपा खातीर हाचे फुडें चिकण मातयेचे गणपती विकते घेवचे. महाराष्ट्रांतल्यान येवपी पीओपी मुर्तींचेर खरसाणेन पाळत दवरतले आनी धाड घालतले. आमी कमीत कमी माती मळपाच्यो 60 माक्ना दिल्यात. हे माक्नांक लागून कामगारांक हजार भर दिसावडो दिवचो पडटालो तो आता कमी जालां, अशे आर्लेकार हांणी सांगले.
जाल्यार पीओपीचे मुर्ती विकता तांचेर धाड घालप आनी तांका दंड दिवप ही प्रदुशण मंडळाची जापसालदारकी. महामंडळाक कारवाय करपाचो कसलोच अधिकार ना. पूण महामंडळ आनी प्रदुशण मंडळ मेळून पीओपी आड कारवाय करतले, अशें गावडे हांणी सांगले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
