भांगरभूंय | प्रतिनिधी
फोंडें : संजीवनी साखर कारखान्या मुखारच्या राष्ट्रीय महामार्गाचेर बिरेस्तारा सकाळीं सुमार ५ वरांचेर एका अनवळखी वाहनाचो धपको बसून दुचाकी चालक महमदरिफ हुसेनबाशा मोमीन (२८, भूमिकानगर- उसगांव) हाका मरण आयलें. जाल्यार दुचाकीचेर आशिल्लो आनीक एकलो गंभीर जखमी जाला. ताचेर सध्या गोमेकॉंत उपचार सुरू आसात. इश्टाच्या वाडदिसाची पार्टी सोंपोवन ते घरा येतना हो अपघात जालो. फोंडें पुलीस सध्या वाहनाचो सोद घेतात.
हे विशीं मेळिल्ले म्हायती प्रमाण, मोलें वाठारांतल्यान उसगांवां वतना बिरेस्तारा सकाळीं सुमार ५ वरांचेर हो अपघात घडलो. महमदरिफ मोमीन आनी ताचो इश्ट नेस्ले कंपनींत काम करताले. ते दोगूय बुधवारा इश्टाच्या वाडदिसाक गेल्ले. मरण आयिल्ल्या तरणाट्याक दोन म्हयन्यांचो पूत आसा. फोंडेंचे पुलीस निरीक्षक विजयनाथ कंवळेकार हे विशीं तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
