भांगरभूंय | प्रतिनिधी
मुकेश थळीः एमईएसांत अणकार आनी रोजगार संदी कार्यशाळेचें उक्तावण
वास्कोः आयचे घडयेक रेडियो, टीव्ही, खबरांपत्रां, प्रशासकी कामकाज, हेर माध्यमां हांकां अनुवादकांची व्हड प्रमाणांत गरज लागता. देखून सक्षम तांकिवंत अनुवादकां खातीर वाडट्यो रोजगार संदी मुखार येतात, ताचो तांणी लाव घेवचो अशें नामनेचे साहित्यीक, अनुवादक आनी कोशकार मुकेश थळी हांणी सांगलें. तरणाट्यांनी अनुवाद कुशळटायेचें तंत्र आनी मंत्र जाणून घेवन बरो सराव करून प्रभुत्व मेळोवचें अशें आवाहन तांणी केलें.
ते काल झुआरीनगरच्या एमईएस महाविद्यालयांत अणकार आनी रोजगार संदी ह्या विशया वेल्या दिसभराच्या राज्य पांवड्या वेल्या कार्यशाळेचें उक्तावण करतकच उलयताले.
ही कार्यशाळा महाविद्यालयाच्या कोंकणी विभागान आनी गोवा कोंकणी अकादेमीन जोड पालवान आयोजीत केल्ली.
थळी हांणी कोंकणी विश्वकोश विभागांतले तशेंच आकाशवाणी वेले खबरांच्या अणकाराचे अणभव सांगलें. अणकारांत पदरचें घालूंक मेळना आनी कितेंय टाळूंक मेळना हें तांणी देख दिवन स्पश्ट केलें. साहित्याचे अणकार कितले कठीण आसतात तेंवूय तांणी देखी दिवन स्पश्ट केलें.
उक्तावण सत्रांत साहित्य अकादेमी पुरस्कार फावो जाल्ले खातीर मुकेश थळी हांचो शाल, श्रीफळ आनी मानपत्र दिवन प्राचार्य मनस्वी कामत हांचे हस्तुकीं भोवमान जालो. गोवा कोंकणी अकादेमीचे दत्तराज नायक हांणी आपल्या उलोवपांत अकादेमीच्या वेगळ्यावेगळ्या येवजण्यांची माहिती दिली. म्हाविद्यालयाचे कोंकणी विभाग प्रभारी प्रा. सत्यवान नायक हांणी येवकाराचें उलोवप केलें आनी मानपत्राचें वाचन केलें. दिसभर चलपी वेगळ्यावेगळ्या सत्रांनी शरत रायकार, सुशांत नायक, एविता डिसोझा, संदीप शिरोडकार ह्या जाणकारांनी अणकाराच्या वेगळ्यावेगळ्या तांसांचेर विद्यार्थ्यांक मार्गदर्शन केलें. हे कार्यशाळेंत गोंयच्या वेगळ्यावेगळ्या म्हाविद्यालयांतले विद्यार्थी वांटेकार जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
