भांगरभूंय | प्रतिनिधी
पणजी: धर्मीक भावना दुखयिल्ल्या प्रकरणांत काणकोण पुलिसांनी गुन्यांव दाखल केले उपरांत उद्देजक दत्ता नायक हांकां मडगांवच्या दक्षीण गोंय जिल्हो आनी सत्र न्यायालयान सशर्त अटकपूर्व जामीन मंजूर केल्लो. त्या वेळार तांकां न्यायालयाच्या परवानगे बगर गोंया भायर वचपाक बंदी घाल्ली. मजगतीं, मुंबय उच्च न्यायालयाच्या गोंय खंडपिठान 16 ते 23 जानेवारी मजगतीं पुण्यां वचपाक मेकळीक दिल्या.
धर्माच्या नांवा खाला मठ, देवळां खूबशे पयशे लुट्टात अशें उलोवप उद्देजक दत्ता नायक हांणी एका खबरां चॅनलाक मुलाखत दितना केल्लें. ह्या उलोवपाक लागून तांणी समाजीक शांततायेचो भंग करीत धर्मीक भावना दुखयिल्ल्या प्रकरणांत तांचे आड काणकोण पुलिसांनी गुन्यांव नोंद केल्लो.
ह्या प्रकरणांत मडगांवच्या दक्षीण गोंय जिल्हो आनी सत्र न्यायालयान सशर्त अटकपूर्व जामीन मंजूर केल्लो. तातूंत वयले अटी सयत हेर अटी घाल्ल्यो. ताका लागून दत्ता नायक हांणी न्यायालयांत अर्ज दाखल करून 16 ते 23 मजगतीं पुण्याक वचपाक परवानगी मागिल्ली.
ह्या अर्जाची फुडली सुनावणी न्यायालयान 21 वेर दवरिल्ली. ताका लागून नायक हांणी गोंय खंडपिठांत याचिका दाखल केली. ह्या प्रकरणांत उच्च न्यायालयांत सुनावणी जाली तेन्ना नायक हांचे वकील क्लियोफात कुतिन्हो हांणी वयले मुद्दे उपस्थीत करून युक्तिवाद केलो. हाची दखल घेवन न्यायालयान दत्ता नायक हांकां पुण्यां वचपाक मेकळीक दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
