भांगरभूंय | प्रतिनिधी
महाराष्ट्रांतलो पोस्टमन येत सावन पत्रां वेळार मेळानाशिल्ल्याच्यो कागाळी
भांगरभूंय । प्रतिनिधी
फोंडें: तिस्क- उसगांव आनी धारबांदोडें पोस्ट कार्यालयांत महाराष्ट्रांतल्या पोस्टमनाची भरती करीत सावन पत्रां मेळानाशिल्ल्यो कागाळी वाडपाक लागल्यात. नोव्हेंबरांत धाडिल्लीं पत्रां जानेवारींत मेळ्ळी हे खातीर लोकांनी तिडक उक्तायल्या. लोकांक पत्रां वेळार मेळनाशिल्ल्यान परिक्षेक बसपाची तरणाट्यांची संद चुकल्या. पोस्ट कार्यालयांतलो वेव्हार सुदरावचो, अशी तिडकल्ल्या लोकांनी केल्या.
पोस्ट कार्यालयांत महाराष्ट्रांतल्या तरणाट्यांची नोकर भरती केल्ल्यान थळाव्या पोस्टमनांक घरा बसपाचो वेळ आयला. थळावे पोस्टमन लोकांक वेळार पत्रां दिताले. पूण फाटल्या एक दोन वर्सां सावन पोस्ट कार्यालयांत महाराष्ट्रांतल्या तरणाट्यांची भरती केल्ल्यान लोकांक वेळार पत्रां मेळनात. नोव्हेंबरांतलीं पत्रां लोकांक जानेवारींत मेळपाक लागल्यांत, अश्यो लोकांच्यो कागाळी वाडपाक लागल्यात. कांय खाजगी कंपनीं कडल्यान धाडिल्ल्या पत्रांचोय तातूंत आस्पाव आसा. उसरां पत्रां मेळिल्ल्यान खूबशे तरणाटे परिक्षेक पावूंक नाशिल्ल्यान तांचेर बेरोजगार रावपाचो वेळ आयला.
तिस्क- उसगांवां पोस्टमन म्हूण एके चलयेची नेमणूक केल्या. ते चलये वांगडा लोकांचीं पत्रां वांटपाक एक जाण्टी बायल भोंवता, अशें दिसून आयलां. पत्रां दिवपा खातीर ते चलये वांगडा भोंवपी जाण्टे बायले कडल्यान लोकांक आरत्यो परत्यो जापो आयकुच्यो पडटात. ताका लागून एक दीस रागाच्या भरांत वाद निर्माण जावपाची शक्यताय आसा.
तिस्क- उसगांव वाठारांतल्या पोस्टमनाचो कारभार सध्या दुबावाचो थारला. दोन- तीन वर्सां आदीं पोस्टांतल्यान धाडिल्लो एके व्यक्तीचो चॅक गायब जावपाचो प्रकार घडिल्लो. चॅक पोस्ट कार्यालयांत धाडले उपरांत आनी तो चॅक ते व्यक्तीक पावयला, असो मॅसेज मोबायलाचेर आयले उपरांत चवकशी केली तेन्ना तो चॅक गायब जाल्ल्याचें कळिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
