भांगरभूंय | प्रतिनिधी
फोंडें: फोंडें शारांत मंगळारा राती वेळार गव्यान शारांत प्रवेश केल्ल्यान लोकांची भियेवन गुळी जाली. फोंडें उजो पालोवपी दळाच्या कार्यालया कडल्यान गव्यान शारांत प्रवेश केलो. फाटल्या मंगळारा फांतोडेर 4 ते 5 वरांच्या सुमाराक गवो पॅट्रोल पंपा कडेन भोंवतना दिशिल्लो. ताका लागून फोंडें वाठारांत गव्याचो वावर आशिल्ल्याचो दुबाव उक्तायतात.
मंगळारा राती वारखंड वाठारांतल्या उजो पालोवपी दळाच्या कार्यालया कडल्यान अचकीत गवो मुख्य रस्त्याचेर आयलो. त्या वेळार लोकांनी सादुरकायेन गाडयो फुडें व्हेल्यो. कांय जाणांनी व्हिडियो काडून व्हायरल केले. रातच्या 11.30 वरांच्या सुमाराक ही गजाल सगळे कडेन पावली. गव्यान थेट मुख्य रस्त्या वयल्यान वयल्या बाजाराचे दिशेन पळ काडलो. त्या वेळार रान खात्याच्या कर्मचाऱ्यांनी लेगीत बाजारांत येवन गव्याची पळोवणी केली. रातचो वेळ आशिल्ल्यान बाजारांत सामसूम आशिल्ली. पूण कांय गाडयो येता- वताल्यो. तांकां ह्या गव्याचें दर्शन जालें. फाटल्या सोमारा फांतोडेर 4 ते 5 वरां मदीं गवो बाजारांत आशिल्ल्या पॅट्रोल पंपा कडेन दिशिल्लो. वाठारांत आशिल्ल्या साबार दुकानांच्या सीसीटीव्ही कॅमेऱ्यांत तो कैद जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
