दोगां चलयांचेर सामुहीक अत्त्याचार करून ब्लॅकमेल करपी तिगांक अटक
भांगरभूंय | प्रतिनिधी
बेळगांव, खबरां संस्था : रायबाग म्हालांतल्या सवसुद्दी लागसारच्या दोंगर वाठारांत दोगी चलयांचेर सामुहीक अत्त्याचार जालो. तीग जाणांनी मेळून त्या दोगांचेर अत्त्याचार केलो. हे विशीं म्हायती मेळटांच अभिशेक, आदिल जमादार आनी ड्रायव्हर कौतुक बडिगेर ह्या तिगांक पुलिसांनी अटक केली.
हे विशीं बेळगांव जिल्लो पुलीस अधीक्षक डॉ. भीमाशंकर गुळेद हांणी सांगलें, इन्स्टाग्रामावेल्यान अभिषेकाची एके चलये कडेन वळख जाली. ताणें चलयेक आपूण सौंदत्तीक वता म्हणून सांगलें. ताच्या सांगण्याचेर विस्वास दवरून पिडेस्त चलयेन आपले इश्टीणीक वांगडा घेतली आनी तीं दोगांय बस स्टॅण्डा कडेन गेलीं. थंय अभिषेकान येवन चलयांक मोटारींतल्यान घेवन गेलो. तिगूय आरोपी मोटारींत आशिल्ले. उपरांत त्या तिगायनी त्या दोनूय पिडेस्त चलयांक दोंगराळ वाठारांत व्हेलीं. तांणी ३ जानेवारीक दनपरां चलयांचेर अत्याचार केले. कागाळ करपी चलयेचेर अभिषेकान आनी कौतुक बडीगेर हांणी बलात्कार केलो.
मजगतीं, आदिल जमादारान गाडयेंत बशिल्ले चलयेचेर बलात्कार केलो. आरोपींनी तांच्या मोबायल फोनाचेर व्हिडिओ केलो आनी त्या दोगांकूय ब्लॅकमेल केलें. मुखार तांणी चलयांक गोंयांत येवपा खातीर ब्लॅकमेल केलें. पिडेस्त चलयांनी हे विशीं घरा म्हायती दिली. उपरांत चलयेन चुलत भावा वांगडा येवन १३ जानेवारीक हारुगेरी पुलीस स्टेशनाचेर कागाळ केली. २४ वरांनी पुलिसांनी तिगा आरोपींक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
