भांगरभूंय | प्रतिनिधी
वास्को : रेल्वे मार्ग दोट्टीकरणाक आदले मुख्यमंत्री मनोहर पर्रीकार हांणी विरोध केल्लो. जंयच्यान रेल्वे मार्ग व्हरतले, ती सुवात राज्य सरकाराची आशिल्ल्याचें तेन्ना तांणी स्पश्ट केल्लें अशें विधान कॉंग्रेस प्रदेशाध्यक्ष अमित पाटकार हांणी केलें. मात सध्याचे मुख्यमंत्री केंद्र सरकाराचें सगळें आयकता.तांकां रेल्वे मार्ग दोट्टीकरणाचो आदेश मेळिल्ल्याचो दावो तांणी केलो.
वेळसांवचे राखणे वणटीक लागून लोकांची परंपरीक वाट बंद जावपाची आसा. हाका लागून थळाव्यांक हे परंपरीक वाटेक अधिकार दितले काय? हे विशीं राज्य सरकारान आपली भुमिका स्पश्ट करची असो उलो तांणी मारलो.
रेल्वे विकास प्राधिकरणान वेळसांवच्या एका भागांत रेलमार्गच्या दोट्टीकरणा खातीर राखणे वणट उबारपाचो निर्णय घेतला. हाका लागून परंपरीक वाट बंद जावपाचो भंय थळाव्यांनी उक्तायला. वेळाप्रसंगार आमी कितें करचें असो प्रस्न थळाव्यांनी उक्तायला. हाका लागून तांकां फाटबळ दिवपाक कांय जाण धांवपळ करतात. दोन दिसां पयलीं वेळसांवचे आदले पंच रोकोझिन डिसौझा हांणी पळोवणी करून हो प्रस्न कुठ्ठाळेचे आमदार आंतोनियो वास हांचे मुखार मांडपाचें आव्हान केल्लें. तुमी आमदारां कडेन येनाशिल्ल्यान ही परिस्थिती निर्माण जाल्ल्याचें स्पश्ट करून तांणी दोग जाणांक लक्ष्य केलें. उपरांत १४ जानेवारीक अमित पाटकार हांचे सयत थळावे समाजीक कार्यकर्ते ओर्विल दोरादो, ओलंसियो सिमोईस तशेंच कॉंग्रेसीचे कांय पदाधिकारी थंय पळोवणी करपा खातीर आयले तेन्ना थळाव्यांनी तांचे मुखार आपली बाजू मांडली. ह्या वेळार म्हयती दितना पाटकार हांणी मुख्यमंत्र्यांक लक्ष्य केलें. वेळसांवचो प्रस्न आमी येवपी विधानसभा अधिवेशनांत आमच्या आमदारां वरवीं हजर करतले अशें तांणी स्पश्ट केलें. हे विशीं खासदार कॅप्टन विरियतो फर्नांडीस हांणी लोकसभा अधिवेशनांत सेगीत आवाज केल्ल्याचें तांणी सांगलें.
लोकांनी आमदार वास हांकां हांगच्या कच्चा रस्त्याचें डांबरीकरण करपा संबंदी २०२२त एक निवेदन दिल्लें. ते विशीं आजूनय जाप दिवंक नाशिल्ल्याचें स्पश्ट करून पाटकर हांणी आमदार वास हांकां लक्ष्य केलें. थळाव्यांच्यो समस्या लोकप्रतिनिधींनी सोडोवपाक जाय. आमी थळाव्यांच्या फाटल्यान उबे रावतले अशेंय तांणी स्पश्ट केलें.
जे सुवातेर रेल्वे आपलो अधिकार सांगता, ती तांची न्हय तर ग्रामस्थांची आशिल्ल्याचो दावो ओर्विल दोरादो हांणी कागदपत्रां सयत केलो. रेल्वेन वेळसांव वाठारांतले खंयचेय जमनीचें भूसंपादन करूंक नाशिल्ल्याचें तांणी स्पश्ट केलें. रेल्वेन खाजगी सुवातेर उडयल्ली मातयेची रास थंयच्यान काडून जमीन आदले वरीं करून दिवची अशी मागणी तांणी केली. सर्वे विभागान फकत एके सुवातेच्या सीमांकना संबंदी सर्वे केलां. हेर सुवातांचें सर्वेक्षण करूंक नाशिल्ल्याचें तांणी स्पश्ट केलें. हाचे फाटलें कारण खबर नाशिल्ल्याचेंय तांणी म्हणलें. आमी आतां मेरेन शांतीकायेन आमची मागणी मांडटात. फुडाराक हो प्रस्न सुटावो जांक ना जाल्यार आमकां आंदोलनाचो मार्ग आपणावचो पडटलो अशी शिटकावणीय तांणी ह्या वेळार दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
