भांगरभूंय | प्रतिनिधी
म्हापशें : म्हापशेंच्या कदंब बस स्टॅण्डा फाटल्यान म्हापशें पुलिसांनी छापो घालून १.२० लाखांचो गांजो जप्त केलो. हे विशीं दुबावीत रुद्र नारायण जेना (२१, रा. ओडिशा) हाका अटक केली. ही कारवाय पुलिसांनी मंगळारा सांजेवळार उसरां केली.
हे विशीं चड म्हायती प्रमाण, बस स्टॅण्डा फाटले वटेन ड्रग्साची विक्री वेव्हार जातलो अशी म्हायती कोणा कडल्यान तरी पुलिसांक सांगली. मागीर पुलिसांनी सांपळो रचलो. दुबावीत घडणुके सुवातेर पावतांच ताका धरलो आनी ताची झडटी घेतली. तेन्ना ताचे कडेन १ किलो २०० ग्रॅम वजनाचो गांजो सांपडलो.
पुलीस निरीक्षक निखिल पालेकार हांच्या मार्गदर्शनाखाला उपनिरीक्षक दत्तप्रसाद पंडित, पंढरी चोपडेंकार, आदित्य गाड, हवालदार सुशांत चोपडेंकार, महेंद्र मांद्रेंकार, प्रकाश पोळेकार, अक्षय पाटील, राजेश कांदोळकार आनी आनंद राठोड ह्या पंगडान हें काम केलें. फुडलो तपास पुलीस अधीक्षक अक्षत कौशल आनी उपअधीक्षक संदेश चोडणकार हांच्या मार्गदर्शना खाला पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
