भांगरभूंय | प्रतिनिधी
मुंबय, खबरां संस्था: मकर संक्रांती दिसा बंदी घाल्ले नायलॉन दोरयेक लागून महाराष्ट्रांत तिगांक मरण आयलें. जाल्यार गुजरातांत चवगांक. बंदी आसून लेगीत हे दोरयेचो वापर केल्ल्यान महाराष्ट्रांत आठ जाण जखमी जाले. हातूंत उत्तर महाराष्ट्रांत सात, जाल्यार नागपूरांत एक बायल पुलीस जखमी जाली. मुंबय बेकायदो नायलॉन दोरये आड पुलिसांनी विशेश मोहीम राबयली. हातूंत १९ गुन्यांव दाखल केले.
सक्रांतीक पतंग हुबोवपाची परंपरा आसा. मात हातूंत नायलॉन दोरयेचो वापर केल्ल्यान लोकांचो जीव वचपाक लागला. थोडे कवचेचो पिठो लायिल्लो मांजा दोरोय वापरतात. मंगळारा हाचो फटको सवण्यांकूय बसलो. नायलॉन दोरयेन गळो कापिल्ल्यान नासिक आनी नंदुरबार, अकोला जिल्ह्यांत एकेकल्याक मरण आयले. नंदुरबारांत सात वर्सा पिरायेचो कार्तिक गोरवे हो आपल्या आज्या वांगडा दुचाकीन वतालो. तेन्ना वाटेक आशिल्ले नायलॉन दोरयेन ताचो गळो चिरिल्ल्यान ताका मरण आयलें. जाल्यार नाशिकांत सोनू धोत्रे ह्या २३ वर्सां पिरायेच्या तरणाट्याक दुचाकीवेल्यान वतना मरण आयलें. सोनू हो परबे खातीर गुजरातच्यान आयिल्लो. मे म्हयन्यांत ताचें लग्न जावपाचें आशिल्लें. अकोला शारांत दुचाकीस्वार किरण प्रकाश सोनोने हांच्या गळ्याभोंवतणी नायलॉन दोरी आडकल्ल्यान तांकां मरण आयलें.
मुंबय पुलिसांची मोहीम
मुंबय पुलिसांनी १० ते १५ जानेवारी ह्या काळांत बेकायदेशीर नायलॉन दोरयेच्या वापरा विशीं विशेश मोहीम राबयल्ली. हे मोहिमे मजगतीं १९ गुन्यांव दाखल केल्यात. तशेंच हे कारवायेंत १९ जाणांक अटक केली. जाल्यार कांय जाणांक नोटीचो दिल्यात. हे विशीं पुलीस तपास करतात
गुजरातांत चवगांक मरण
अहमदाबाद-गुजरातांत पतंगाचे नायलॉन दोरयेक लागून चार जाणांक मरण आयलें. राजकोट, पंचमहल, मेहसाणा तशेंच सुरेंद्रनगर ह्या जिल्ह्यांत दरेकी एकेकल्याक मरण आयलें. पंचमहल जिल्ह्यांत हलोल शारांत कुनाल परमार (४) हो भुरगो आपल्या बापाय वांगडा दुचाकीन वतना ताच्या गळ्याक नायलॉन दोरी आडकून ताका मरण आयलें. मेहसाणा जिल्ह्यांत मनसाजी ठाकोर हे दुचाकीवेल्यान शेतांत वतना ताच्याय गळ्याक नायलॉन दोरी आडकून ताका मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
