भांगरभूंय | प्रतिनिधी
पौराणीक काळांत गंधर्व विवाह जाताले. कांय देवांचीं पसून तशीं लग्नां जाल्यांत, असो उल्लेख कांय ग्रंथांनी आसा. ह्या लग्नांत न्हवरो, व्हंकलेक कुटुंबाचे परवानगेची गरज नासताली. तातूंत विधी, हुंडो, लग्नाचो खर्च, जात असलीं कसलींच बंधना, रिती नासताल्यो. जोडपें फक्त सोपूत घेवन वा मुदी घालून आपूण घोव, बायल अशें घोशीत करतालीं. समाजाची ताका परवानगी नाशिल्ली. देखून हीं लग्नां गुपचूप जातालीं. तीं कायद्यान सिद्ध करपाक मेळनाशिल्लीं. कारण तांकां साक्षिदार बी आसतालेच अशें नात. इतिहासीक काळांतूय राजांनी हे तरेचीं लग्नां केल्यांत. ताका मोगांत पडून लग्न जावप म्हणूं येता. दुस्माना पसून स्वताक वाटावपाक कांय राजा आपले चलयेचें लग्न बळिश्ट राजा कडेन करून ताचे कडेन नातेसंबंद जोडटाले. मोगांत पडून लग्न जावपाचे प्रकार पयलीं सावन घडल्यात. धर्मीक सुवाळो करचे परस कायदेशीर सरकारी नोंदणी करून लग्न करपीय हजारांनी जोडपीं आसात. मात हालींच्या कांय वर्सांनी लिव्ह इन रिलेशनशीप पद्दतीचीं लग्नां (?) वाडल्यांत. समाजांतल्या कांय घटकांचो खर विरोध आसलो तरी तीं जातात.
लिव्ह इन रिलेशनशीप म्हणल्यार 18 वर्सां वयल्या दोन व्यक्तींनी लग्न करिनासतना एकठांय रावप. तांचे मदीं शारिरीक संबंद आसतात. एकठांय रावपाक नोंदणी करपाची गरज ना. संबंद सोंपोवपाक घटस्फोटाचीय गरज ना. दोगांयचीं मनां जुळटात काय नात, हें पळोवपाक अशे रावतात खंय. ह्या आधुनीक लग्ना संबंदीचो कायदो नासलो, तरी सर्वोच्च न्यायालयान ताका परवानगी दिल्या. दादलो, बायलेन एकठांय रावप हो तांच्या जगपाच्या हक्काचो एक वांटो, अशें तें म्हणटा. ह्या संबंदांक तें गुन्यांव मानिना. जोडप्या मदीं वाद जालो जाल्यार कायद्यान कोणाचेर कारवाय (पोटगी आनी हेर गजाली) करपाक मेळना. मात कांय वर्सां पयलीं लिव्ह इन रिलेशनशिपांत रावपी तरणाट्यान जोडिदाराक जिवेशीं मारपाचे 2- 3 प्रकार घडले. ताका लागून लग्नाचो हो प्रकार खूब वादग्रस्त थारलो. तातूंत जोडप्यांचे धर्म वेगळेवेगळे आशिल्ल्यान ह्या वादाच्या उज्यांत आनीक तेल पडलें.
आतां उत्तराखंडांतल्या भाजप सरकारान समान नागरी संहितेंत लिव्ह इन रिलेशनशीप संबंदी (आनी कायदेशीर लग्नाचेय) नवे नेम हाडपाचें थारायलां. फक्त एकठांय रावप पसून लागीं- लागीं कायदेशीर लग्ना सारकेच जातलें. चड करून हो बदल 26 जानेवारीक लागू जातलो. आतां थंय लिव्ह इन रिलेशनशिपांत रावपी जोडप्यांक सरकारी नोंदणी करची पडटली. व्हिडियो रेकाॅर्डिंग, आधारकार्ड, साक्षिदारांचें मत नोंद करून घेवप सक्तीचें आसतलें. उत्तराखंडांतल्या सगल्या धर्माच्या लोकांक हे नेम लागू जातले. अधिकाऱ्यांक ह्या नव्या कायद्याचें प्रशिक्षण दिवप सुरू जालां. लिव्ह इन रिलेशनशिपाचे नोंदणी खातीर एक वॅबसायटूच तयार केल्या. ती नागरीक आनी सरकारी कर्मचाऱ्यांक वापरूंक मेळटली. लाॅग इन करपाक आधार कार्ड लागतलें. एकठांय केन्ना रावतले, त्या दिसाची नोंदणी, ते संबंद केन्ना सोंपयतले, कायदेशीर वारस कोण, मालमत्तेची नोंदणी, ती कोणाक दिवपाची ही सगली म्हायती वॅबसायटीचेर फीड करची पडटली. कोणाचो लग्नाक वा लिव्ह इन रिलेशनशिपाक विरोध आसा जाल्यार ताका वॅबसायटीचेर कागाळ करूं येता. कोण चुकीची वा सूड घेवपाक म्हायती घालीत म्हूण कागाळी तपासपाचें काम रजिस्ट्राराक दिलां. हो कायदो फक्त नव्यान एकठांय रावप्यांक न्हय, तर आतां कोण रावतात तांकांय लागू जातलो. तांकां नांव, पिराय, राष्ट्रीयताय, धर्म, आदलो रिलेशनशीप स्टेटस, फोन, पत्तो दिवचो पडटलो. लग्नाची नोंदणी करप्यांकूय हें सगले नेम लागू जातले. लग्न वा घटस्फोट जालो काय गॅझेटाचेर ती म्हायती येता, तशी ती ह्या पोर्टलाचेर येतली. इतलेंय करून लिव्ह इन रिलेशनशीप लग्न पद्दतीचेर नियंत्रण येतलें काय ना तें सांगपाक येना. हाका विरोधूय जावं येता. कारण अती मेकळ्या विचारांच्या कांय तरणाट्यांच्या मतान, नवे बदल हे कायदेशीर लग्नूच केल्ले सारकें.
लिव्ह इन रिलेशनशिपाक लागून गुन्यांवकारी प्रवृत्तीच्या दादले आनी बायलांचें फावलां, अशें थोड्यांक दिसता. तें सामकेंच फट म्हणू नजं. खास करून सिलेब्रिटी, मौज मजेचेर भर दिवपी तरणाट्यांक ही लग्न पद्दती खूब आवडटा. कारण कायदो तांकां कांयच करपाक शकना. आधुनीक विचारांचे लोकूय हाचें समर्थन करतात. पळोवंक गेल्यार लग्न पद्दतीक धपको दिवपी अशी ही लिव्ह इन रिलेशनशीप पद्दत. उत्तराखंडा फाटल्यान हेर राज्यांनीय तिचेर निर्बंध येवं शकतात. हे पद्दतीचेर बंदी हाडली वा हाडूंक ना, तरी स्वैराचार बंद जातलो, हाची खात्री कोण दिवंक शकना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
