भांगरभूंय | प्रतिनिधी
अशे तरेचो लाभांश दिवप ही इतिहासांत पयलीच खेपः गणेश गांवकार
पणजीः गोंय पर्यटन उदरगत म्हामंडळाचो जेन्ना सावन हांवें ताबो घेतला तेन्ना सावन म्हामंडळ फायद्यांत आयलां. म्हज्या कार्यकाळांत पयलेचे खेपे 45 लाखाचो लांभाश म्हामंडळा कडल्यान आमी सरकाराक दिला, अशी म्हायती गोंय पर्यटन उदरगत म्हामंडळाचे अध्यक्ष आनी आमदार गणेश गांवकार हांणी दिली.
गोंय पर्यटन मंडळ बसके उपरांत गणेश गांवकार हांणी ही म्हायती दितना सांगलें की, 21 एप्रील 2022 वर्सा गोंय पर्यटन उदरगत म्हामंडळाची जापसालदारकी मुख्यमंत्र्यांनी म्हज्या खांद्यार दिली आनी अध्यक्षपदाचो ताबो घेतलो.
त्या वेळार सुरवातेकच सरकार स्थापन जाल्लें तेन्ना मुख्यमंत्र्यांनी आमकां सगल्यांक एक मंत्र दिल्लो की सगलीं सरकारी म्हामंडळां फायद्यांत येवपाक जाय, आनी तीं कशीं फायद्यांत येतलीं हाचे खातीर काम करचें. म्हामंडळाचो पुराय पंगड आदले वेवस्थापकी संचालक आनी पुराय अधिकाऱ्यां सयत हो विचार मनांत दवरून ते दिकेत काम करपाक सुरूवात केली, अशें गणेश गांवकार हांणी सांगलें.
2022-23 वर्सा आमी 45 लाख इतलो लाभांश सरकाराक दिलो, आनी परतून 2023-24 वर्सा 45 लाखा परस चड लाभांश सरकाराक मंगळारा दिलाे. फाटल्या 9 म्हयन्यांत दिसून आयिल्ले अर्थीक परिणाम सकारात्मक आसात. अशे लाभांश आमकां फुडलीं तीन वर्सा सेगीत दिवपाक शक्य जातले. बिगर अर्थीक म्हामंडळान अशे तरेचो लाभांश दिवप ही इतिहासात पयलेच खेपे आसा, अशें गणेश गांवकार हांणी म्हणलें.
हें करता आसतना मुख्यमंत्री प्रमोद सावंत हांचे मार्गदर्शन आनी पर्यटन मंत्री रोहन खंवटे हांचे सहकार्य आसा. आमचे सगले वेवस्थापकी अधिकारी तशेच ल्हान-वड अधिकारी, कर्मचारी सर्वसामावेशक यत्न करून बरे काम करतात. म्हामंडळाचो ताबो घेतले उपरांत ते बरे भशेन चलयलें आनी फाटलीं सेगीत दोन वर्सा रु. 45 लाखा परस चड लाभांश दिल्ल्याची म्हाका खोशी जाता, अशें गणेश गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
