भांगरभूंय | प्रतिनिधी
पत्रकार परिशदेंत मंत्री गोविंद गावडे हांची म्हायती
पणजी: कला आनी संस्कृती खात्या वतीन 17 ते 26 जानेवारी मजगतीं, 24 व्या लोकोत्सवाचें आयोजन केलां. हो महोत्सव पणजेंतल्या कला अकादमी वाठारांत सकाळीं 10 ते रातीं 10 मजगतीं जातलो अशी म्हायती कला आनी संस्कृती मंत्री गोविंद गावडे हांणी दिली.
मंगळारा पणजेंत घेतिल्ले पत्रकार परिशदेंत ते उलयताले. ह्या वेळार खात्याचे संचालक सगूण वेळीप, कला अकादमीचे वांगडी सचीव अरविंद खुटकार बी मानेस्त हाजीर आशिल्ले.
गावडे हांणी सांगलें, लोकोत्सवाचें उक्तावण 17 जानेवारी दिसा सांजवेळा 6 वरांचेर मुख्यमंत्री डॉ. प्रमोद सावंत आनी खासदार सदानंद शेट तानावडे हांचे हस्तुकीं जातलें. अंदूंच्या लोकोत्सवांत 20 राज्यांचें 600 लोक कलाकार जाल्यार 1000 हस्त कलाकार वांटेकार जातले. तशेंच 550 स्टॉलांचेर हस्तकला आनी खाद्यपदार्थांची विक्री जातली. सद्दां सांजवेळा 6 ते 10 मेरेन लोकनृत्यांच्यो कार्यावळी जातल्यो.
तांणी मुखार उलयतना म्हणलें, अंदूं राजस्थानाची मांगणियारी गितां, कालबेलीया आनी चरी नृत्य, आसामाचें बिहु. गुजराताचो गरबा, मेवासी, रास आनी सिध्दी धमाल, महाराष्ट्राचो पोवाडो आनी लावणी, अस्तंत बंगालाचो पुरुलिया छांव, नाटुआ आनी रायबेन्से, कर्नाटकाचो ढोलू कुनिथा, हरियाणाचो घुमर, ओडीशाचाे गोटीपुआ, मणीपुरचो पुंग ढोल चोलम आनी उत्तर प्रदेशाचो थेंढीया ह्या सारक्या देशभरांतल्या विवीध लोकनृत्यांचो आस्वाद रसिकांक घेवंक मेळटलो.
गोंयच्या लोककलाकारांच्या 20 पंगडा भितर गणेश वंदना, घोडेमोडणी, जागोर, मुसळ, दिवली, गोफ, देखणी, मांडो, कुणबी, तोणयामेळ, दांडलां खेळ, तालगडी, मोरुलो, विरभद्र आनी धनगर आदीं लोकनृत्य सादर करतले. तशेंच 20 जानेवारी सावन पांच दीस मोलेला (टेराकोटा कला) कार्यशाळा घेतले. तशेंच महोत्सवांत गोंयकार चित्रकारांच्या चित्रकला आनी शिल्पकलाकृतींचें प्रदर्शन जातलें.
येरादारी कोंयडे विशीं कागाळ ना
महोत्सवाक लागून कांपाल वाठारांत येरादारीची कोंयडी जायत आशिल्ल्याची कसलीच कागाळ खात्या कडेन आयिल्ली ना. अशी कागाळ आयली जाल्यार ताचेर आमी विचार करतले. पूण लोकोत्सव हो गोंयचो ब्रॅण्ड उत्सव आसा हें लेगीत समजून घेवंक जाय अशें गोविंद गावडे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
