भांगरभूंय | प्रतिनिधी
मुख्यमंत्री डॉ. प्रमोद सावंत हांच्या फुडारपणा खाला गोंय पर्यटन मंडळाची बसका
पणजीः सांस्कृतीक पर्यटन जशें की एकादस तीर्थ उपक्रमांक चालना दिवप, सोशल मिडियाचेर चलपी बदनामी आड मोहीम सुरू करप, तशेंच वेवसायांत सुलभाताय हाडपा खातीर सिंगल विंडो क्लिएरन्स दिवपा विशींची चर्चा 5 व्या गोंय पर्यटन मंडळाचे बसकेंत जाली. तशेंच जी दर्यादेगेर समस्या आसा ती संबंदीत खात्यांचे नदरेक हाडून सोडोवप अशें हे बसकेंत थारलें.
मुख्यमंत्री डॅ. प्रमोद सावंत हांच्या फुडारपणा खाला पर्वरे मंत्रालयांत 5 व्या गोंय पर्यटन मंडळाची बसका जाली. ह्या वेळार पर्यटन मंत्री रोहन खंवटे, गोंय पर्यटन उदरगत म्हामंडळचे अध्यक्ष गणेश गांवकार, मंडळाचे वांगडी तशेंच पर्यटन खात्याचे हेर अधिकारी हाजीर आशिल्ले.
बसके उपरांत मुख्यमंत्री डॉ. प्रमोद सावंत हांणी सांगलें, गोंयच्या पर्यटन मळाक घटाय दिवपा खातीर क्रुझ टर्मिनलांची उदरगत करपा विशींचेर म्हत्वाची चर्चा जाली.
क्रुझ टर्मिनलांनी व्हाय फाय, नितळसाण गृह, फुटपाथ, लॉज, हॉटेल, प्रतिक्षा कक्ष, सुरक्षा तपासणेक गती दिवपा सारकिल्ल्या गजालींचो आस्पाव करून गोंय हें क्रुझ बोटीं खातीर घरचें बंदर म्हूण वळख तयार करतले अशें मुख्यमंत्र्यांनी सांगलें.
येरादारी सुविधेंत सुदारणां हाडपा खातीर मंडळान प्रस्ताव दवरला की, विमानतळ, रेल्वे स्टेशन आनी क्रुझ टर्मिनलांचेर टेक्सी भाड्याचे दर नियंत्रीत जावचे, तशेंच प्रवाशांक बरी सेवा आनी सर्वसमावेक्षक दर लागू करचे. तशेंच रेंट अ कार सेवेक खर निर्बंध लागू करपाची सुचोवणी केल्या अशी म्हायती मुख्यमंत्र्यांनी दिली.
एकादशी तीर्थ सारकिल्ल्या सांस्कृतीक पर्यटनाक प्रोत्साहन दिवपा खातीर फुडाकार घेवप, जी बदनामी चल्ल्या ताचे आड संवसारीक मोहीम चलोवप, परिचीत करपी टूर आनी विदेशी मिडियांत मार्केटींग मोहीम चलोवपाचेर चर्चा जाली. तशेंच बसका, प्रचार, परिशद आनी प्रदर्शन (मायस) पर्यटन आनी लग्न सुवाळ्यां खातीर सिंगल विंडो दाखलो यंत्रणा बसोवन राज्यांत चडांत चड पर्यटन आकर्शीत करपाचो प्रस्ताव दवरला, अशें मुख्यमंत्र्यांनी सांगलें.
ही बसका दर स म्हयन्यांत जावप सक्तीचें आसा. पूण ही बसका प्रलंबीत आसली आनी मंगळारा मुख्यमंत्र्यांनी ही बसका आपयली, अशें पर्यटन मंत्री रोहन खंवटे हांणी सांगलें.
गोंय पर्यटन मंडळ हें पुराय देशांत एकूच मंडळ आसा जातूंत 50 टक्के पर्यटन भागधारक आनी 50 टक्के पर्यटन खात्याचो आस्पाव आसा. ज्या धोरणा विशींचे मुद्दे एकठांय येवन चर्चा करतात. काल जाल्ले भागधारकांचे बसकेची फाटपुरवण करपी ही मंगळारची बसका आशिल्ली आनी जे मुद्दे भागधारकांनी मांडिल्ले ते बसकेंत आयले, अशें खंवटे हांणी सांगलें.
आमी विविध खात्या कडल्यान हस्तक्षेप करपाची सुचोवणी केल्या. दर्यादेगेर हेडगीं गोरवां आनी रस्ताद सुणीं, टावट्स, कोयर ही समस्या हुस्क्याची जावन आसा. देखून आमी मुखेल सचिवांक सांगला की ह्या विशया विशीं संबंदीत खात्याची बसका आपयात आनी हाचेर कसली कृती येवजण करतले हाचें एक सादरीकरण मुख्यमंत्र्यां मुखार दवरपाची सुचोवणी केल्या. तशेंच टॅक्सी चालकांनी तंत्रगिन्यानाचो आस्पाव करचो म्हूण सुचोवणी केल्या अशी म्हायती खंवटे हांणी दिली.
गोंयांत बरें पर्यटन जावचें हाची खात्री करपा खातीर येता त्या दिसांनी आमी स्पश्ट येवजण तयार करतले. हे बसकेचे इतिवृतांत आयले उपरांत सगल्यांक निर्देश वचून सगल्यो गजाली बेगोबेग जाग्यार पडटात हाची खात्री करतले अशें खंवटे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
