भांगरभूंय | प्रतिनिधी
वास्को: येवपी दीस हे मुरगांव मतदारसंघा खातीर उदरगतीचे आसतले. हांगा वीस खाटींच्या हॉस्पिटलाचो बुन्यादी फातर येवपी तीन म्हयन्यांत करपाचे निर्देश मुख्यमंत्री डॉ. प्रमोद सावंत हांणी दिले. विवीध उदरगतीच्या कामांक वेग आनी प्राधान्य दिवपाचे निर्देश डॉ. सावंत हांणी दिले.
येवपी काळांत मुरगांवच्या लोकांक कोळसा प्रदूशणाची मात्रा उणी जाल्ली दिसतली. प्रदुशण उणे जावपा खातीर पावलां उबारपी हांव पयलोच आमदार आशिल्ल्याचें मुरगांवचे आमदार संकल्प आमोणकार हांणी सांगलें. येवपी काळांत मुरगाव मतदार संघांतल्या रस्त्याचेर एकूय फोंडकूल दिसचें ना अशीय गवाय तांणी ह्या वेळार दिली.
मुख्यमंत्र्यां सयत आमदार आमोणकर हांची मुरगांव मतदार संघातल्या उदरगतीच्या कामा संबंदी खास बसका जाली. ह्या वेळार विवीध खात्यांचे सुमार ७० -८० विभाग मुखेली आनी हेर अधिकारी हजर आशिल्ले.
त्या सगळ्यांक मुख्यमंत्री डॉ. सावंत हांणी मुरगांव मतदारसंघांत विवीध कामांक फास्ट ट्रॅकाचेर घेवपाची खर सुचवणी दिल्ल्याची म्हायती आमोणकर हांणी दिली. हांगा २० खाटींचें हॉस्पिटल बांदपा खातीर हॉस्पिटलाचो प्रस्न आशिल्लो. ते विशीं योग्य लक्ष घालपाच्यो सुचवण्यो मुख्यमंत्र्यान केल्यो.
ह्या वेळार सडा वाठारांतल्या उदकाच्या समस्या विशीं चर्चा जाली. हांगा ८०० धन मेट्रीक टनच्यो दोन टाकयो बांदपाचे निर्देश दिले. मुरगांव किल्ल्या कडेन वचपा खातीर मुरगांव बंदर प्राधिकरणान वाट दिल्ल्यान त्या किल्ल्याचो सांबाळ आनी सोबितीकरणाचें काम बेगीनूच सुरू जातलें. सड्यावेल्या रोझ सर्कलाच्या मैदानांत फ्लडलायट आनी हेर सुविधायो करतले. सड्यावेले गोवा पुनर्वसन मंडळाचे वसणुकेंतल्या लोकांक तांच्यो सदनिका तांच्या नांवांचेर करपाची प्रक्रिया सुरु जातली. बायणा दर्यादेगेर नुस्तेंमार भावां खातीर जेटी तशेंच जाळें दवरपाक आनी हेर सुविधा उपलब्ध करून दितले, अशी म्हायती आमोणकार हांणी दिली.
बायणा दर्यादेगेच्या सोबितीकरणाचें काम हातांत घेतले. थंय चेंजींग रुम, वॉश रुम अश्यो जायत्यो सुविधायो उपलब्ध करतले. हाका लागून थंय प्रवाशांचो आंकडो वाडटलो. मुरगाव बंदरांत आंतरराष्ट्रीय क्रूझ टर्मिनल बांदतले. हाका लागून सडा ते मुरगांव बंदर मेरेनचो रस्तो रूंद करपाचो प्रस्ताव आशिल्लो. हाका लागून सुमार ३५० झाडांचेर काळ येतलो. तशेंच आतां मुरगांव बंदर ते बायणा असो उड्डाण पुल बांदिल्ल्यान जड वाहनां ताचे वेल्यान वतलीं. हाका लागून प्रस्तावीत रस्त्याची गरज पडची ना हें आपणें नदरेक हाडून दिलां. २१ जानेवारीक मुख्यमंत्री स्वता त्या रस्त्याची पळोवणी करून फुडलो निर्णय घेतले. २१ जानेवारी सावन बंदरांतलीं सगळीं जड वाहनां उड्डाण पूल वापरतलीं. हाका लागून जेटी, सडा वाठारांतल्यान जावपी मुरगांव बंदराची येरादारी बंद जातली. हाका लागून प्रदूशणाक आनी अपघात जावचे ना. मुरगांव बंदरांत कोळसो व्हरपी कंपन्यो थंय डोम बांदतात. तें काम कांय दिसांनी पुराय जातलें. म्हणून प्रदुशण आनीर उणें जातलें अशेंय तांणी स्पश्ट केलें. हांव म्हजें काम करीत रावतलों. विरोधकूय टिका करीत रावतले. म्हाका कांयच फरक पडना. हांव लोकां खातीर काम करतां अशें ते म्हणटात अशेंय आमदार आमोणकार हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
